ރައްޔިތުންގެ މަޖިލީހުގެ ފަސް މެމްބަރަކު ސެކިއުރިޓީއަށް އެދިވަޑައިގަތުމުން، އެމްއެންޑީއެފްއިން ސެކިއުރިޓީ ފޯރުކޮށްދޭން ފަށާފައިވާ ކަމަށް ރައްޔިތުންގެ މަޖިލީހުން ބުނެފިއެވެ.
ސަރުކާރު ހިންގާ މައި ޕާޓީ އެމްޑީޕީއަށް ނިސްބަތްވެ ވަޑައިގަންނަވާ ބައެއް މެމްބަރުންނަށް، ދާދީ ފަހުން އިންޒާރުތަކެއް ދީފައިވާ ކަމަށް އިތުބާރު ހުރި މަސްދަރަކުން ވަނީ ރާއްޖެ.އެމްވީ އަށް ވަނީ ކަށަވަރުކޮށްދީފައެވެ. އިންޒާރުތައް ލިބުމާއި ގުޅިގެން، މެމްބަރުން ސެކިއުރިޓީއަށް އެދިވަޑައިގަތުމުން މަޖިލީހުން ވަނީ އެކަން އެމްއެންޑީއަށް އަންގާފައެވެ.
މަޖިލީހުގެ އަމީން އާންމު ފާތިމަތު ނިއުޝާ ވިދާޅުވީ ، ސެކިއުރިޓީއަށް އެދިވަޑައިގެންނެވި ފަސް މެމްބަރުންނަށް އެމްއެންޑީއެފްއިން މިހާރު ސެކިއުރިޓީ ފޯރުކޮށްދޭން ފަށާފައިވާ ކަމަށެވެ. ރައްޔިތުންގެ މަޖިލީހުގެ މެމްބަރުން ސެކިއުރިޓީ އަށް އެދިއްޖެނަމަ އެމްއެންޑީއެފުން ސެކިއުރިޓީ ފޯރުކޮށްދެން ޖެހެއެވެ.
މީގެ ކުރިން ރައްޔިތުންގެ މަޖިލީހުގެ މެމްބަރުންތަކަކަށް މަރުގެ އިންޒާރުތަކެއް ދިނުމާއި ގުޅިގެން އެމްއެންޑީއެފުން ސެކިއުރިޓީ ފޯރުކޮށްދީފައިވެއެވެ. އެގޮތުން 2014 ވަނަ އަހަރު އެމްޑީޕީގެ ހަތަރު މެމްބަރަކަށް މަރުގެ އިންޒާރު ދީފައިވެއެވެ. އެ މެމްބަރުންނަށް އިންޒާރުދިނީ ކޮން ބައެއްކަން ދެނެގަނެވިފައިވާކަމަށް، ގެއްލުވާލާފައިވާ މީހުންނާ މަރާލާފައިވާ މީހުންގެ މައްސަލަ ބެލުމަށް އުފައްދާފައިވާ ރިޔާސީ ކޮމިޝަނުން ވަނީ މި އަހަރުގެ މޭމަހު ބުނެފައެވެ.
