ޕްރައިމަރީ ހެލްތުކެއާ ޕްރޮގްރާމަށް ހާއްސަ ސަމާލުކަމެއް ދެއްވާނެ ކަމަށް ރައީސް ވިދާޅުވެއްޖެ

މިއަހަރުން ފެށިގެން ޕްރައިމަރީ ހެލްތުކެއާ ޕްރޮގްރާމަށް ހާއްސަ ސަމާލުކަމެއް ދެއްވާނެ ކަމަށް ރައީސް އިބްރާހީމް މުޙައްމަދު ސޯލިހު ވިދާޅުވެއްޖެއެވެ.

ރައީށް ސޯލިހު މިހެން ވިދާޅުވެފައިވަނީ ބ. އަތޮޅުގެ ސިއްހީ ހިދުމަތުގެ ރަންޔޫބީލް ފާހަގަ ކުރުމަށް އަންގާރަ ދުވަހުގެ ރޭ ބ އޭދަފުށީގައި ބޭއްވި ޖަލްސާ ޝަރަފުވެރި ކޮށްދެއްވައި ވާހަކަފުޅު ދައްކަވަމުންނެވެ.

އެގޮތުން، ރައީސް ވަނީ ސިއްހީ ދާއިރާއަށް ރައްޔިތުންގެ ހޭލުންތެރިކަން އިތުރުކުރުވުމުގެ ނަތީޖާއެއްގެ ގޮތުން ރާއްޖެއަށް ލިބުނު ބައެއް ކާމިޔާބީތަކުގެ މައްޗަށް އަލިއަޅުއްވާލައްވާފައެވެ.

ދެކުނު އޭޝިޔާ ސަރަޙައްދުގެ ޤައުމުތަކުގެ ތެރެއިން، އެންމެ ފުރަތަމަ މެލޭރިޔާ އާއި ފައިލޭރިޔާ ނައްތައިލެވުނު ޤައުމަކީ ދިވެހިރާއްޖެކަމާއި ޕޯލިއޯ އާއި މީސަލްސްވެސް ރާއްޖެއިން ނައްތައިލެވިފައިވާކަން އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ. އަދި އެ ކާމިޔާބީގެ ފަހަތުގައިވަނީ، ރާއްޖޭގައި ކުރިން އޮތް ޕްރައިމަރީ ހެލްތު ކެއަރ ޕްރޮގްރާމުކަން ވެސް ރައީސްގެ ވާހަކަފުޅުގައި ފާހަގަކުރެއްވިއެވެ.

ބ. އަތޮޅުގެ ސިއްހީ ޚިދުމަތް ފެށިގެން އައިގޮތުގެ ވާހަކަ ދައްކަވަމުން ރައީސް ވިދާޅުވީ އެމަނިކުފާނުގެ ބޮޑުބޭބޭފުޅު އެކަމުގައި ހިއްސާވެވަޑައިގެންފައިވުމަކީ، އެމަނިކުފާނާއި އާއިލާއަށް ލިބިވަޑައިގަންނަވާ އުފަލަކާއި ފަހުރެއްކަމަށެވެ.