ސިއްހީ ދާއިރާގެ އެންމެ ބޮޑު މައްސަލައަކީ އެދާއިރާއަށް ކޮރަޕްޝަން ވަނުން: ރައީސް ސޯލިހު
30 ޖުލައި 2019 | އަންގާރަ 18:37ރައްޔިތުންނަށް ލުއިފަސޭހަ ކޮށްދިނުމަށް ރާވާފައި ހުރި ކަންކަމުގެ ތެރެއަށް ވަނީ ކޮރަޕްޝަން ވަދެފައި
ރައީސް އިބްރާހިމް މުހައްމަދު ސޯލިހް ޖަލްސާގައި ވާހަކަފުޅުދައްކަވަނީ
ސިއްހީ ދާއިރާގެ އެންމެ ބޮޑު މައްސަލައަކީ އެދާއިރާއަށް ކޮރަޕްޝަން ވަނުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ބ. އަތޮޅު ސިއްހީ ޚިދުމަތުގެ ރަންޔޫބީލް ފާހަގަކުރުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން ރައީސް ސޯލިހު ވިދާޅުވީ އެންމެ ބޮޑު ހޭދައެއްކުރަނީ ސިއްހީ ނިޒާމު ހަރުދަނާ ކުރުމަށް ކަމަށާއި، ގިނަ މަސައްކަތްތައް ކުރެވޭ ކަމަށެވެ.
ރައީސް ސޯލިހު ވިދާޅުވީ ސިއްހީ ނިޒާމުގެ ތެރެއިން މައްސަލަތައް ފެންމަތިވާއިރު މި ނިޒާމުގެ އެންމެ ބޮޑު މައްސަލައަކީ، ރައްޔިތުންނަށް ލުއިފަސޭހަ ކޮށްދިނުމަށް ރާވާފައި ހުރި ކަންކަމުގެ ތެރެއަށް ކޮރަޕްޝަނާއި ފަސާދަ ވަނުން ކަމަށެވެ. ރައީސް ސޯލިހު ވިދާޅުވީ އާސަންދަ ފަދަ ނިޒާމުތައް އޭގެ ހަގީގީ މަގުސަދު ހާސިލް ނުވާ ކަމަށެވެ. އަދި ހަގީގީ މަގުސަދު ހާސިލްނުވެ، ދައުލަތުގެ ބަޖެޓަށް ބުރަ ބޮޑުވަނީވެސް ކޮރަޕްޝަންގެ ސަބަބުންކަން އެމަނިކުފާނު ފާހަގަކުރެއްވިއެވެ.
ސިއްހީ ޚިދުމަތަކީ ރާއްޖޭގެ ކޮންމެ ރަށެއްގައި ހަރުދަނާ ކުރަންޖެހިފައިވާ ކަމެއްކަން ފާހަގަކުރައްވައި ރައީސް ސޯލިހު ވިދާޅުވީ އެކަށީގެންވާ ވަރަށް ޑޮކްޓަރުންނާ ނަރުހުންނާއި، ސިއްހީ އެހީތެރިން އަދި އިމާރާތުގެ ދަތިކަން ކުރިމަތިވެފައިވުމަކީ ކޮންމެ ރަށަކަށް ވެސް ކުރިމަތިވެފައިވާ ވަރަށް ބޮޑު ގޮންޖެހުމެއް ކަމަށެވެ. އަދި ރަށްރަށުން އެކަށީގެންވާ ސިއްހީ ހިދުމަތްތައް ލިބެން ނެތުމަކީ، މިއަދުވެސް ރައްޔިތުންގެ އެންމެ ބޮޑު ޝަކުވާކަން އެމަނިކުފާނު ފާހަގަކުރެއްވިއެވެ.
ރައީސް ސޯލިހު ވިދާޅުވީ ސިއްހީ ފަރުވާ ހޯދުމަށް އަމިއްލަ ރަށް ނޫން އެހެންތާކަށް ދިޔަ ނަމަވެސް ވަކި ޚާއްސަ ޑޮކްޓަރަކަށް ދެއްކުމަށް ގިނަ ތަކުލީފުތައް ރައްޔިތުން އުފުލާ ކަމަށެވެ. އެގޮތުން މާލެއަށް ދިޔަސް، ވަކި ބައްޔަކަށް ޚާއްސަ ޑޮކްޓަރަކަށް ދެއްކުމަށް، އެތައް ދުވަހަކު އިންތިޒާރުގައި ތިބެންޖެހޭ ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ މަސައްކަތް ކުރަނީ ރައްޔިތުންނާ ވީހާ ގާތުން ނުވަތަ އެމީހަކު ހުރި ރަށަކުން އެންމެ އެކަށީގެންވާ ސިއްހީ ފަރުވާ ފޯރުކޮށްދިނުމަށް ކަމަށެވެ.
ބ. އަތޮޅަށް އަލިއަޅުއްވާލައްވާ ރައީސް ސޯލިހު ވިދާޅުވީ ފަތުވެރިކަން ފުޅާވަމުން އަންނަ ނިސްބަތަށް ބަލާއިރު، އެއަތޮޅުގައި ސިއްހީ ޚިދުމަތްތައް ހަރުދަނާ ކުރުމަކީ، ތަރައްގީއަށް ވަރަށް މުހިންމު ކަމެއް ކަމަށެވެ. މާލެ އަތޮޅާއި އަރިއަތޮޅު ފިޔަވައި ދެން އެންމެ ގިނަ ރިސޯރޓް ހިންގަނީ ބ. އަތޮޅުގައި ކަމަށް ރައީސް ވިދާޅުވިއެވެ.
ބ. އަތޮޅު ސިއްހީ ޚިދުމަތުގެ ރަންޔޫބީލް ފާހަގަކުރުމުގެ ރަސްމިއްޔާތުގައި ބ. އަތޮޅު ސިއްޙީ ޙިދުމަތަށް 20 އަހަރަށްވުރެ ގިނަ ދުވަހު ޙިދުމަތްކޮށްދެއްވި ފަރާތްތަކަށް ހަނދާނީ ފިލާ ވަނީ ދެއްވާފައެވެ.
