ޓްރީޓޮޕް ހޮސްޕިޓަލަށް ދިޔުމަށް ގެސްޓް ޓްރާންސްފަރގެ ހިދުމަތް ތައާރަފުކޮށްފި
30 ޖުލައި 2019 | އަންގާރަ 07:00މި ހިދުމަތަށް އެއްވެސް ފީއެއް ނުނަގާނެ
ޓްރީޓޮޕް ހޮސްޕިޓަލް
މާލެ ސިޓީ އިން ޓްރީޓޮޕް ހޮސްޕިޓަލަށް ދިޔުމަށް ގެސްޓް ޓްރާންސްފަރގެ ހިދުމަތް ތައާރަފު ކޮށްފިއެވެ.
މި ހިދުމަތް އެ ހޮސްޕިޓަލްގެ ކޯޕަރޭޓް ސޯޝަލް ރެސްޕޮންސިބިލިޓީގެ ދަށުން ތައާރަފުކޮށްފައިވާއިރު މި ހިދުމަތަށް އެއްވެސް ފީއެއް ނުނަގާނެއެވެ. އެ ހޮސްޕިޓަލުން ބުނީ މި ހިދުމަތް ތައާރަފުކޮށްފައިވަނީ ހިދުމަތް ހޯދަން ހޮސްޕިޓަލަށް ޒިޔާރަތްކުރާ އާންމުންނަށް ފަސޭހަކޮށްދިނުމުގެ ގޮތުން ކަމަށެވެ.
ހޮސްޕިޓަލުން އެޕޮއިންޓްމަންޓް ޔަޤީންވާ ވަގުތު ޓްރާންސްފަރ ހިދުމަތަށް ބުކިންގ ހެދުމުގެ ފުރުސަތު ގެސްޓް ސަރވިސް ރިސެޕްޝަން އަދި ކޮންޓެކްޓް ސެންޓަރުގެ ނަންބަރު 3351610 އިން ހެދޭނެ ކަމަށް ހޮސްޕިޓަލުން މައުލޫމާތުދެއެވެ. އަދި މި ހިދުމަތް ބޭނުންކުރުމަށް އެޕޮއިންޓްމަންޓް ކަށަވަރު ވިކަމުގެ މެސެޖް ޑްރައިވަރަށް ދައްކަންވާނެ ކަމަށާއި ކޮންމެ ބަލިމީހަކާއެއްކޮށް އެއް އެހީތެރިއަކަށް މި ހިދުމަތް ބޭނުންކުރެވޭނެ ކަމަށް ވެސް އެ ހޮސްޕިޓަލުން ބުންޏެވެ.
ޓްރާންސްފަރގެ ހިދުމަތް ދިނުމަށް ހަމަޖެހިފައިވަނީ މާލެ ޕޮލިސް ޓޯޔާޑް ކައިރިން، ބޮޑުތަކުރުފާނު މަގުން ކަމަށް ވެސް އެ ހޮސްޕިޓަލުން އިތުރަށް ބުނެއެވެ.
