'' އަރްޖުން ޕަޓިއާލާ'' ގެ ފެށުން ރަނގަޅެއް ނޫން

ނިމިގެންދިޔަ ހަފްތާގެ ހުކުރު ދުވަހު ރިލީޒް ކުރި ޕަންޖާބުގެ މަޝްހޫރު ލަވަ ކިޔުންތެރިޔާ ދިލްޖީތް ދޮސަން އާއި ކްރިތީ ސަނޯން ހަރަކާތްތެރިވާ ހިންދީ ފިލްމު ''އަރުޖްން ޕަޓިއާލާ'' ބެލުންތެރިންނަށް މާ ކަމުދިޔަ ފިލްމަކަށް ނުވިއެވެ.

ރޯހިތް ޖުގްރާޖް ޑައިރެކްޓް ކޮށްފައިވާ މި ފިލްމަށް ތިން ދުވަސް ތެރޭގައި ލިބިފައިވަނީ އެންމެ 2.75 ކްރޯޑެވެ. އެ އަދަދަކީ ކްރީތީގެ ފިލްމަކަށް ބަލާއިރު ވަރަށް ދަށް އަދަދެކެވެ. މި ފިލްމާ އެއްދުވަހެއްގައި ރިލީޒް ކުރި ރާޖް ކުމާރް ރާއޯގެ ''ޖަޖްމެންޓަލް ހޭ ކިޔާ'' ފިލްމު ވަނީ 29 ކްރޯޑް ރުޕީސް ހޯދާފައެވެ.

އަރްޖުން ޕަޓިއާލާ އަކީ ހެއްވާ މަޖާ ފިލްމެކެވެ. ފިލްމުގައި ފެނިގެންދަނީ ނޫސްވެރިޔަކާއި ފުލުސް އޮފިސަަރަކާއި ދެމެދު ހިނގާ ހެއްވާ މަޖާ ހާދިސާ ތަކެކެވެ. ނޫސްވެރިއެއްގެ ރޯލް ކްރިތީ ކުޅެފައިވާއިރު ދިލްޖީތް ފެންނަނީ ފުލުސް އޮފިސަރެއްގެ ރޯލުންނެވެ. ފިލްމުގައި ސަނީ ލިޔޯންވެސް ފެނިގެންދެއެވެ.