ފަންނާނުންގެ މިޔުޒިކީ އީދަށް ހޫނު ތަރުހީބެއް!

ދިވެހިރާއްޖޭގެ 54 ވަނަ މިނިވަންދުވަހާއި ދިމާކޮށް ކުރިޔަށް ގެންދިޔަ " ދިވެހި ފަންނާނުންގެ މިޔުޒިކީ އީދު" އަށް ވަރަށް ހޫނު ތަރުހީބެއް ލިބިއްޖެއެވެ.

ހޮނިހިރު ދުވަހުގެރޭ 8:30 އިން 12:00 އާއި ހަމައަށް އަލިމަސް ކާނިވާގައި ކުރިޔަށް ދިޔަ މި އިވެންޓުގައި ދިވެހި ގިނަ މިޔުޒިކީ ފަންނާނުންނާއި ބޭންޑުތަކުގެ އިތުރުން ބޮޑުބެރު ގްރޫޕްތައް ވަނީ ބައިވެރިވެފައެވެ.

މި އިވެންޓް ބަލާލުމަށްޓަކައި ގިނަ އަދަދެއްގެ ޒުވާނުން ވަނީ ކާނިވާ ސްޓޭޖް ސަރަހައްދަށް ގޮސްފައެވެ.

ފަންނާނުންގެ މިޔުޒިކީ އީދުގައި ހުށައެޅުންތައް ހުށައަޅާދިން ފަންނާނުންގެ ތެރޭގައި މީރާ، ހަބޭސް ބޮޑުބެރު ގްރޫޕް، ނިޝް، ބިދަބިން، ދަންމާނު ބޮޑުބެރު ގުރޫޕް، ގްރެވިޓީގެ އިތުރުން ޓަސް ވެސް ވަނީ ފެނިގެންގޮސްފައެވެ.

ދިވެހި ފަންނާނުންގެ މިޔުޒިކީ އީދު ޖުލައި 28 ވަނަ ދުވަހުގެ ރޭ، އަދި މާ ފޯރިއާއި އެކު 8:30 ފެށިގެން ކާނިވާ ސަރަހައްދުގައި ކުރިޔަށްދާނެ ކަމަށް އެންސީއޭއިން މައުލޫމާތު ދެއެވެ.