ވަކީލުންގެ ފަރާތުން ޖޭއެސްސީ އަށް މާނިއު ހުސެއިން އިންތިހާބުވެ ވަޑައިގެންފި
ހީކުރި ވަރަށް ވުރެ އަދަދު މަދު
މާނިއު ހުސެއިން
ވަކީލުންގެ ފަރާތުން ޖުޑީޝަލް ސަރވިސް ކޮމިޝަން ( ޖޭއެސްސީ ) އަށް އަބްދުﷲ މާނިއު ހުސެއިން އިންތިހާބުވެ ވަޑައިގެންފިވެއެވެ.
ހޮނިހިރު ދުވަހު ބޭއްވި އެ އިންތިހާބުގައި މާނިއު އިންތިހާބުވެވަޑައިގެންނެވީ ހަތަރު ކެނޑިޑޭޓުންނާ ވާދަކޮށެވެ. މާނިއު އަށް 199 ވޯޓު ލިބިވަޑައިގެންނެވި އިރު އޭނާއާ އެންމެ ގާތުން ވާދަކުރެއްވި އަލީ ރަޝީދު އަށް ލިބިވަޑައިގަތީ 124 ވޯޓެވެ.
ކުރީގެ އިންފޮމޭޝަން ކޮމިޝަނަރު ޖަމާލް އަބޫބަކުރު އަށް ލިބިވަޑައިގަތީ 37 ވޯޓެވެ. އެ އިންތިހާބުގައި ވާދަކުރެއްވި ހަމައެކަނި އަންހެން ވަކީލާ މަރިޔަމް ހަނީފާ ހާލިދު އަށް ލިބިވަޑައިގަތީ އެންމެ 27 ވޯޓެވެ. އެންމެ މަދުން ވޯޓު ލިބިވަޑައިގެންނެވީ އަހުމަދު ރަޝީދުއަށެވެ. އޭނާ އަށް ލިބިވަޑައިގެންނެވީ އެންމެ ނުވަ ވޯޓެވެ.
އިންތިހާބުގައި ވޯޓުލުމަށް 1487 ވަކީލުން ރަޖިސްޓްރީ ކޮށްފައިވާއިރު އޭގެ ތެރެއިން ވޯޓުލާފައިވަނީ އެންމެ 404 ވަކީލުންނެވެ. އެ އަދަދަކީ ހީކުރިވަރަށް ވުރެ ކުޑަ އަދަދެއް ކަމަށް އީސީގެ ތަރުޖަމާނު އަހުމަދު އަކުރަމް ކަމަށް ވިދާޅިވިއެވެ.
ހަވީރު ފަހެއް ޖަހަންދެން ކުރިޔަށްދާ އިންތިހާބުގެ ވޯޓުފޮށިތައް މާލޭގެ އިތުރުން އައްޑޫ ސިޓީގައި ވަނީ ބަހައްޓާފައެވެ.
އިންތިހާބުގައި ހަ ވަކީލަކު ކުރިމަތިލެއްވިއެވެ. ނަމަވެސް މީގެ އެއް ވަކީލެއްގެ ކެންޑިޑެސީ ބާތިލްވުމާއެކު އިންތިޚާބުގައި ވާދަކުރެއްވީ ފަސް ވަކީލުންނެވެ.
ޖޭއެސްސީގައި ވަކީލުންގެ ތެރެއިން އައްޔަން ކުރައްވާ ވަކީލަކަށް ކުރިން އިންނެވީ ލަތީފާ ގާސިމެވެ. ނަމަވެސް ގާނޫނީ ފަންނުގެ ބިލް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގު ކުރެއްވުމާ ގުޅިގެން އޭނާގެ މަގާމު މިދިޔަ ޖޫން މަހުގެ 27 ވަނަ ދުވަހު ވަނީ ގެއްލިފައެވެ.
