އައިއޯއައިޖީ 2019: ކުޅުނު ހުރިހާ މެޗަކުން މޮޅުވެ ސިންގަލްސް އިވެންޓުން ދީމާ އާއި ރަފާ ގަދަ 16 އަށް

އިންޑިއަން އޯޝަން އައިލޭންޑް ގޭމްސްގެ ޓޭބަލް ޓެނިސްގެ ސިންގަލްސް އިވެންޓުގެ އައިޝަތު ރަފާ ނާޒިމް އަދި ފާތިމަތު ދީމާ އަލީ ގްރޫޕްގެ އެއްވަނައިގެ ގޮތުގައި ގަދަ 16 އަށް ދަތުރު ކޮށްފިއެވެ.

ހުކުރު ދުވަހު ކުޅުނު ގްރޫޕް ސްޓޭޖުގެ މެޗުތަކުގައި ރަފާ އަދި ދިމާ މޮޅު ކުޅުމެއް ދައްކާފައިވާއިރު، މި ދެ ކުޅުންތެރިން ވަނީ ކުޅުނު ހުރިހާ މެޗެއް ކާމިޔާބު ކޮށްފައެވެ.

ރަފާ އަދި ދީމާގެ އިތުރުން ފާތިމަތު ޖުމާނާ ނިމާލް ވެސް ވަނީ ގްރޫޕްގެ އެއްވަނައިގެ ގޮތުގައި ގަދަ 16 އަށް ދަތުރު ކޮށްފައެވެ. އަދި ހިމެނުނު ގްރޫޕްގެ ދެވަނަ ހޯދައިގެން މުއީނާ މުހައްމަދު ވެސް ވަނީ ގަދަ 16 އިން ޖާގަ ކަށަވަރު ކޮށްފައެވެ.

ސިންގަލްސް ފިރިހެން ބައިގައި ރާއްޖޭގެ އިސްމާއިލް ޝައްފާން ގްރޫޕްގެ އެއްވަނައިގެ ގޮތުގައި ގަދަ 16 އަށް ދަތުރު ކުރިއިރު، މުހައްމަދު ޒީސްތު ނައީމް ގަދަ 16 އަށް ދަތުރުކުރީ ގްރޫޕްގެ ދެވަނައިގެ ގޮތުގައެވެ.

ފިރިހެން ސިންގަލްސް ބައިން މުންތިފް އަހުމަދު ކަޓާފައިވާއިރު، މޫސާ މުންސިފަށް ލިބިފައިވަނީ އޭނާ ހިމެނުނު ގްރޫޕްގެ ދެވަނައެވެ. އެގޮތުން ގަދަ 16 އަށް ދިޔުމަށް އޭނާ ޕްލޭއޮފްއެއް ކުޅެން ޖެހޭނެއެވެ.

ޓީޓީ އަންހެން ޓީމް އިވެންޓުން ރާއްޖެއިން ރަން މެޑަލް ހޯދާފައިވާއިރު، އަންހެން ޑަބަލްސް އިވެންޓުން ރާއްޖެއިން ވަނީ ރަން މެޑަލްގެ އިތުރުން ރިހި މެޑަލް ހޯދާފައެވެ.

އެގޮތުން ސިންގަލްސް އަންހެން ބައިން ރާއްޖެއިން މެޑަލްއެއް ނުވަތަ ދެ މެޑަލް ހޯދާނެ ކަމަށް ވަރަށް ބޮޑަށް އުންމީދު ކުރެވެއެވެ.