ވަކި ގޮތަކަށް ދައުވާކޮށް ދިނުމަށް އެދި ކުރީ ސަރުކާރުގެ އެއްވެސް ފަރާތެއް އެދިފައި ނުވޭ: ޕީޖީ ބިޝާމް
ޕީޖީ ރައީސް އޮފީހަށް ވަޑައިގަތް ފޮޓޯ އާންމު ވުމާއެކު އޭރު ފާޑުކިޔުން އަމާޒުވި
ޕްރޮސިކިއުޓަރ ޖެނެރަލް އާއިޝަތު ބިޝާމް
ވަކި ފަރާތަކަށް ވަކި ގޮތަކަށް ދައުވާކޮށްދިނުމަށް އެދި މިދިޔަ ސަރުކާރުގެ އެއްވެސް ފަރާތަކުން އެދިފައި ނުވާ ކަމަށާއި އެފަދަ އެއްވެސް ކަމެއް ނުހިނގާ ކަމަށް ޕްރޮސެކިއުޓަރ ޖެނެރަލް އައިޝަތު ބިޝާމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް މިދިޔަ ހަފްތާގައި ހާޒިރުކޮށް ކެންދޫ ދާއިރާގެ މެމްބަރު އަލީ ހުސައިން ކުރެއްވި ސުވާލަކަށް ޖަވާބު ދެއްވަމުން ބިޝާމް ވިދާޅުވީ އޭނާ ރައީސް އޮފީހަށް ވަޑައިގަންނަވަނީ ހަމައެކަނި އެންމެ ބޭނުމެއްގައި ކަމަށެވެ.
އަލީ ހުސައިން ބިޝާމާއި ކުރެއްވި ސުވާލަކީ ޕީޖީ ކަމުގެ މަގާމާއި ހަވާލުވެ ވަޑައިގަތުމަށްފަހު ރައީސް އޮފީހަށް ވަޑައިގެން ދައުވާ ކުރަންޖެހޭ މައްސަލަތަކާއި ގުޅޭ ގޮތުން އެއްވެސް މީހަކަށް އެއްވެސް ގޮތަކަށް ދައުވާ ކުރެވިފައިވާނެތޯ އާއި އެއްވެސް މީހަކާ އެއްވެސް މަޝްވަރާއެއް ކުރެވި އެއްވެސް ގޮތަކަށް ޝަރީއަތަށް ނުފޫޒު ފޯރުވާފަދަ ގޮތަކަށް މަޝްވަރާއެއް ކުރެވި ކަންތައްތައް ވެފައި ވާނެތޯ އެވެ.
ބިޝާމް ވިދާޅުވީ ރައީސް އޮފީހަށް ވަޑައިގެންނެވީ ޕީޖީގެ ހައިސިއްޔަތުން ނެޝަނަލް ޑްރަގް އެޖެންސީގެ މެމްބެރެއް ގޮތުން ކަމަށާއި ކޮންމެ ހަފްތާއެއްގައި ކަހަލަ ގޮތަކަށް އެކަމާއި ގުޅޭ ބައްދަލުވުން ރައީސް އޮފީހުގައި އޮންނަ ކަމަށެވެ. ބިޝާމް ވިދާޅުވީ މިދިޔަ އަހަރު ސޯޝަލް މީޑިއާގައި އޭނާ ރައީސް އޮފީހުން ނިކުމެވަޑައިގަތް ކަމަށް ބުނާ ފޮޓޯ އަކީ ވެސް އެކަހަލަ ބައްދަލުވުމެއް ނިންމަވާލެއްވުމަށްފަހު ނިކުމެވަޑައިގަތް ވަގުތު ނަގާފައިވާ ފޮޓޯއެއް ކަމަށެވެ. އަދި ރައީސް އޮފީހަށް ވަޑައިގެން ވަކި ގޮތަކަށް ވަކި ފަރާތަކަށް ދައުވާ އުފުލުމަށް ކުރީގެ ރައީސް އަބްދުﷲ ޔާމީނާއި އަދި އެއްވެސް ފަރާތެއް ވިދާޅުވެފައިނުވާކަމުގެ ޔަގީންކަން ދެއްވާ ކަމަށް ބިޝާމް ވިދާޅުވި އެވެ.
މިދިޔަ އަހަރުގެ މާޗް މަހުގެ ތެރޭގައި އޭރުގެ ހޯމް މިނިސްޓަރ އަޒްލީން އަހުމަދާއި ބިޝާމް ރައީސް އޮފީހުގެ ބޭރުގައި ތިއްބަވާ ފޮޓޯއެއް އާންމުވިއެވެ. އެފޮޓޯއާއި ގުޅިގެން އާންމުންގެ ފާޑު ކިޔުން އަމާޒުވިއެވެ. އެ ދުވަސްވަރަކީ ޕީޖީ އޮފީހުން އޭރުގެ އިދިކޮޅު ފަރާތްތަކެއްގެ މައްޗަށާއި ދެ ފަނޑިޔާރުންގެ މައްޗަށް އެކެއް ފެބުރުއަރީގައި ސުޕްރީމް ކޯޓުން އަމުރެއް ނެރެ ސަރުކާރު ވައްޓާލަން އުޅުމުގެ ތުހުމަތުތައްކޮށް އެކި ދައުވާކޮށް ކޯޓަށް ފޮނުވާފައިވާ ދުވަސްވަރެވެ.
އެ ކޮމިޓީގައި ބިޝާމް ވަނީ އެއްވެސް ވަކީލެއްގެ ގާތުގައި ވަކި ގޮތަކަށް ދައުވާކޮށްދިނުމަށް އެދިލައްވާފައި ނުވާނެކަމަށާއި ކޮންމެ މައްސަލައެއް ވެސް ދައުވާ ކުރަން ފޮނުވަނީ ދިރާސާ ކުރުމަށް ފަހު ކަމަށް ވިދާޅުވެފައެވެ.
