ހަނދުގެ ދިރާސާތައް ހެދުމަށް އިންޑިއާއިން ކާމިޔާބުކަމާއިއެކު ޖައްވީ އުޅަނދު ޗަންދްރަޔާން 2 އުދުއްސާލުމާއި ގުޅިގެން އިންޑިއާ ސަރުކާރަށާއި އެގައުމުގެ ރައްޔިތުންނަށް ދިވެހި ސަރުކާރުން މަރުހަބާ ކިޔައިފިއެވެ.

ފޮރިން މިނިސްޓްރީން ބުނީ މި އުޅަނދު އުދުއްސާލުމުގެ ފަހަތުގައި ތިބި އިންޑިއަން ސްޕޭސް ރިސަރޗް އޯގަނައިޒޭޝަންގެ ސައިންސްވެރިންގެ މަސައްކަތް ވެގެންދާނީ މިފަދަ ދިރާސާތަކަށް ލިބުނު އިތުރު ކުރިއެރުމަކަށް ކަމަށެވެ.

މިނިސްޓްރީން ބުނީ އިންޑިއާއިން ޖައްވީ ހޯދުންތަކުގައި ހޯދަމުންދާ ކާމިޔާބީތަކަކީ ޖައްވީ ދިރާސާތައް އިތުރަށް ފުޅާކޮށް، ތަރައްގީކުރުމަށް ލިބުނު އިތުރު ހިތްވަރެއް ކަމަށެވެ. އަދި ހަމައެއާއިއެކު ސައިންސާއި ޓެކްނޮލޮޖީގެ ދާއިރާއަށް ޒުވާނުންގެ ޝައުގުވެރިކަން އިތުރުވާނެ ކަމަށް ފޮރިން މިނިސްޓްރީގެ ބަޔާނުގައި ވަނީ ފާހަގަކޮށްފައެވެ.

ޖައްވީ އުޅަނދު ޗަންދްރަޔާން 2 ކާމިޔާބުކަމާއިއެކު އުދުއްސާލުމުގެ ގުޅިގެން ފޮރިން މިނިސްޓްރު އަބްދުﷲ ޝާހިދު ވެސް ވަނީ އިންޑިއާގެ ސައިންސްވެރިންނާއި ބޮޑު ވަޒީރު ނަރެންދްރަ މޯދީ އަށް މަރުހަބާ ދަންނަވާފައެވެ.

އިންޑިއާއިން އުއްމީދުކުރާގޮތުގައި 150 މިލިއަން އެމެރިކާ ޑޮލަރުގެ މިޝަން، ޗަންދްރަޔަން-2 ވެގެންދާނީ ހަނދުގެ ދެކުނު ތަނޑީގައި ޖައްސާ ފުރަތަމަ އުޅަނދަށެވެ.

މި އުޅަނދުގެ މަސައްކަތަކަށްވާނީ ހަނދުގައި ފެނާއި މައުދަން ހުރިތޯ ބެލުމާއި ހަނދަށް އަންނަ ލޮޅުންތައް ބެލުންފަދަ ކަންކަމެވެ. ދުނިޔޭގެ އޯބިޓަށް އުޅަނދު ވަދެފައިވާއިރު ހަނދުގެ އޯބިޓަށް އުޅަނދު ވަނުމުގެ ކުރިން ދުނިޔޭގެ އޯބިޓުގައި 23 ދުވަސް ހޭދަކުރާނެއެވެ.

މި މިޝަން ކާމިޔާބުވެއްޖެނަމަ އިންޑިއާ ވެގެންދާނީ ހަނދުގައި އުޅަނދެއް ޖައްސާ ހަތަރުވަނަ ގައުމަށެވެ. މިހާތަނަށް އެކަން ކުރެވިފައިވަނީ އެމެރިކާ، ޗައިނާ އަދި ކުރީގެ ސޯވިއެޓް ޔޫނިއަން (މިހާރު ރަޝިއާ) އަށެވެ.