ލޯބޮޑު ކަންނެލީގެ މަސްވެރިކަމަކީ ފައިދާވާ މަސްވެރިކަމަކަށް ހަދަނީ
މީގެ ކުރިން ހުޅުވާލި
މަސް ބޯޓެއް
ލޯބޮޑު ކަންނެލީގެ މަސްވެރިކަމަކީ ދިވެހިންނަށް ފައިދާވާ މަސްވެރިކަމަކަށް ހެދުމުގެ މަސައްކަތް ކުރަމުންދާ ކަމަށް ފިޝަރީޒް މިނިސްޓްރީން ބުނެފިއެވެ.
ބޭރުގެ މަސްބޯޓު ފަހަރު ދިވެހި މަސްކަނޑުތަކުގައި މަސްވެރިކަން ކުރުން ހުއްޓުވުމާ ގުޅޭ ގޮތުން ރައްޔިތުންގެ މަޖިލީހަށް ހުށައެޅިފައިވާ ގަރާރާ ބެހޭ ގޮތުން މަޖިލީހުގެ އިގްތިސާދީ ކޮމިޓީ އަށް އަންގާރަ ދުވަހު ފިޝަރީޒް މިނިސްޓަރު ވަނީ ހާޒިރު ކޮށްފައެވެ.
އެ ކޮމިޓީގައި ވާހަކަ ދައްކަވަމުން މިނިސްޓަރު ވިދާޅުވީ، ލޯބޮޑު ކަންނެލީގެ މަސްވެރިކަމަށް ލައިސެންސް ދޫކުރުން ހުއްޓާލުމަށް ނިންމީ ހުޅުވާލި މަގްސަދު ހާސިލް ނުވާތީ ކަމަށެވެ.
އެހެން ނަމަވެސް މަސްވެރިކަން ބައްޓަން ކުރެވިފައި އޮތް ގޮތުން ބާނަމުން ދިޔައީ ރީދު އުރަހަ ކަންނެލި ކަމަށެވެ. މިނިސްޓްރީގެ އަމާޒަކީ ލޯބޮޑު ކަންނެލީގެ ''ހިސްޓޯރިކަލް ކެޗެއް'' ރާއްޖޭގައި ހެދުމެވެ. ރާއްޖެއަކީ ވެސް ލޯބޮޑު ކަންނެލި ބާނާ ބަޔަކަށްވާން ޖެހޭ ކަމަށް ޒަހާ ވިދާޅުވިއެވެ.
މިނިސްޓަރު ވިދާޅުވީ، ލޯބޮޑު ކަންނެލި މަސްވެރިކަން ކުރުމަށް މީހުން ތަމްރީނު ކުރަން މިހާރު ވެސް މިނިސްޓްރީން އޮތީ ތައްޔާރަށް ކަމަށެވެ. މި އަހަރު ތެރޭގައި ވެސް ޕްރޮގްރާމް އަކަށް ފުރުސަތު ހުޅުވާލި ކަމަށާއި، އެހެން ނަމަވެސް އެކަމަށް އެއްވެސް ފަރާތަކުން ޝައުގުވެރިކަން ފާޅުކޮށްފައިނުވާ ކަމަށް ވިދާޅުވިއެވެ.
