އެފްއޭއެމުން އަމަލުކުރިގޮތް ގޯސް، ފީފާއިން އިންތިޚާބު ބާތިލްކޮށްފި

މައްސަލަޖެހިފައިވާ ފުޓްބޯޅަ އެސޯސިއޭޝަން އޮފް މޯލްޑިވްސްގެ އިންތިޚާބުގެ ކަންކަން އެފްއޭއެމުން ކުރިއަށްގެންދިޔައީ ގޯސްކޮށް ކަމަށް ނިންމައި، ފީފާއިން އެ އިންތިޚާބު ކެންސަލްކޮށް، އައު އިންތިޚާބަކަށް ހުޅުވާލަން ނިންމައިފިއެވެ.

ދުނިޔޭގެ ފުޓްބޯޅަ ޖަމްއިއްޔާއިން މި ގޮތަށް ނިންމީ، އެފްއޭއެމުގެ އިލެކްޓޯރަލް ކޮމިޓީގެ ސައްހަކަން ގެއްލިފައިވުމުންނާއި، އަސާސީ ގަވާއިދުގައިވާގޮތަށް އެޕީލްސް ކޮމިޓީ އެކުލަވާލާފައި ނެތުމުންނާއި، އެ އިދާރާގެ ރައީސް ބައްސާމް އަދީލް ޖަލީލްގެ އެކްސްކޯގެ ގާނޫނީ ހައިސިއްޔަތާމެދު ސުވާލު އުފެދިފައި ވުމުންނެވެ.

ފީފާއާއި އޭއެފްސީން މިއަދު އެފްއޭއެމަށް އަންގާފައިވަނީ ކޮންގްރެސްއެއް ބޭއްވުމަށް އިލެކްޓޯރަލް ކޮމިޓީއަކާއި އެޕީލްސް ކޮމިޓީއެއް ނެގުމަށެވެ. މި ގޮތުން ފީފާއިން އެންގީ ތިރީގައި މިވާ ކަންކަމެވެ.

1- އެފްއޭއެމްގެ އިންތިޚާބުގެ އިލެކްޓޯރަލް ޕްރޮސެސް ސައްހަ ނޫންކަމާއި، މިހާރުގެ އިލެކްޓޯރަލް ޕްރޮސެސް ބަލައިނުގަންނަ ކަމަށް.

2- ‏އިލެކްޓޯރަލް ކޮމިޓީއާއި އިލެކްޓޯރަލް އެޕީލްކޮމިޓީ ނަގަންޖެހޭނީ އެއް ކޮންގްރެސްއިން ކަމާއި، އިލެކްޓޯރަލް ކޯޑާ އެއްގޮތަށް އަމަލުކުރުމަށް.

3. އޭގެ ފަހުން އެފްއޭއެމްގެ އިންތިޚާބު އަލުން ހުޅުވާލުމަށް.

އަދި މިއާއެކު، ފީފާ އަދި އޭއެފްސީއިން އިންތިޚާބުގެ ހުރިހާ ހަރަކާތެއް ގާތުން ބަލަމުން ގެންދާނެކަން އަންގާފައިވެއެވެ.

އައު އިންތިޚާބަކަށް ހުޅުވާލަން ފީފާއިން ނިންމިއިރު، ކެންޑިޑޭޓް އަހުމަދު ތާރިގް (ޓޮމް)ގެ އިންތިޚާބީ ޝަރުތު ހަމަނުވާކަމަށް އިލެކްޓޯރަލް ކޮމިޓީން އޮތީ ނިންމާފައެވެ. އަދި އެ މައްސަލަ އެޕީލްކޮށްފައި ވަނިކޮށް، އެޕީލްސް ކޮމިޓީއެއް ނެތްކަމަށް އެފްއޭއެމުން ވެސް ފަހު ވަގުތު އެއްބަސްވިއެވެ. މިކަމާ ގުޅިގެން އެފްއޭއެމްގެ މެމްބަރު 10 ކުލަބަކުން ވަނީ، އެކްސްޓްރާ އޯޑިނަރީ ކޮންގްރެސްއެއް ބާއްވައިދިނުމަށް ޓޮމްއަށް ތާއީދުކުރާ ކުލަބުތަކުގެ ކިބައިން އެދިފައެވެ. ގަވާއިދުގައި ވާ ގޮތުންނަމަ، ހުށަހަޅާ ދުވަހުން ފެށިގެން 14 ދުވަސް ހަމަވެ، މި މަހުގެ 27 ވަނަ ދުވަހު އެ ކޮންގްރެސް ބާއްވަން ޖެހޭނެއެވެ. އެފްއޭއެމުން ނުބާއްވައިފިނަމަ ފީފާ، އޭއެފްސީގެ އިރުޝާދުގެ މަތިން ކުލަބުތަކަށް އަމިއްލައަށް ކޮންގްރެސް ބޭއްވޭނެއެވެ.

އިންތިޚާބަށް ކުރިމަތިލެއްވި ޓޮމްގެ ޝަރުތު ހަމަނުވާ ކަމަށް ނިންމީ، އޭނާއާ ވާދަކުރާ ކެންޑިޑޭޓް މުފާވިޒް ހާޝިމަށް ވެސް ކްލަބް ވެލެންސިއާއިން ތާއީދުކޮށް ސިޓީއެއް ދީފައިވާ މައްސަލާގައެވެ. މިހެންވެ އެ ކުލަބުގެ ތާއީދު އެއްވެސް ކެންޑިޑޭޓަކަށް ކަށަވަރުކުރެވިފައި ނުވާކަމަށް އެފްއޭއެމުގެ އިލެކްޓޯރަލް ކޮމިޓީން ނިންމާފައިވާ މައްސަލަ ވަނީ ހޫނުވެފައެވެ.

އެފްއޭއެމްގެ ގަވާއިދުގައި ވާގޮތުން، އިލެކްޓޯރަލް ކޮމިޓީއަކީ އެ އިދާރާގެ ކޮންގެރްސްގައި އިންތިޚާބު ކުރަންޖެހޭ ކޮމިޓީއެކެވެ. ނަމަވެސް މިވަގުތު އޮތް އިލެކްޓޯރަލް ކޮމިޓީގެ ތިން މެމްބަރުން އިންތިޚާބުކޮށްފައިވަނީ އެފްއޭއެމްގެ ގަވާއިދާ ޚިލާފަށެވެ. އެ ގަވާއިދުގައި ބުނެފައިވަނީ އެއްބަޔަކު ދެ ދައުރަކަށް އިންތިޚާބު ނުކުރެވޭނެ ކަމަށެވެ. ނަމަވެސް އިލެކްޓޯރަލް ކޮމިޓީގެ ޗެއަރމަން އަބްދުﷲ އަލީ ވަނީ ތިންވަނަ ދައުރަކަށް އިންތިޚާބުކޮށްފައެވެ. އަދި މެމްބަރު އަހުމީމް އަބްދުއްރައްޒާގާއި އަބްދުﷲ އަލީ ވެސް އިންތިޚާބުކޮށްފައި ވަނީ ދެވަނަ ދައުރަކަށެވެ. މިކަން އާއްމުންނާއެކު އެނގުމާއެކު އަހުމީމް ވަނީ އިސްތިއުފާ ދެއްވާފައެވެ.

އެފްއޭއެމަކީ ރާއްޖޭގެ އެންމެ ބޮޑު ކުޅިވަރު އެސޯސިއޭޝަން ނަމަވެސް ބައްސާމްގެ ދައުރުގައި އެތަން ހިންގުން ވަނީ ބޮއްސުންލާފައެވެ. އަދި މުވައްޒަފުންނަށް 10 މަސް ދުވަހުގެ މުސާރަ ނުދެވުމާއި، އެތައް ކުންފުންޏަކަށް ދަރައި ފައިސާ ދައްކަން ކޯޓުން ވަނީ ހުކުމްކޮށްފައެވެ. މީގެ އިތުރުން ފައިސާއަށް ޚިޔާނާތްތެރިވިކަމުގެ ތުހުމަތުގައި އެފްއޭމްގެ ލިޔެކިއުންތައް ފާސްކޮށް، ބައްސާމްގެ ތަހުގީގެއް ފުލުހުން ވަނީ ފަށާފައެވެ. އަދި އޭނާގެ ޕާސްޕޯޓް ވެސް ވަނީ ހިފަހައްޓާފައެވެ.