ލޭނުގެ މަސްވެރިކަމުގެ ހުއްދަ ބާތިލް ކުރީ ގަވާއިދާ ހިލާފުވާތީ: ޒަހާ
ބޮޑަށް ފައިދާ ވަނީ ބިދޭސިންނަށް
ފިޝަރީޒް މިނިސްޓަރު ޒަހާ ވަހީދު
ލޭނުގެ މަސްވެރިކަމަށް ދޫކޮށްފައިވާ ލައިސެންސް ބާތިލް ކުރަން ޖެހުނީ ގާނޫނާ ގަވާއިދާ ހިލާފު ކަންތައްތަކެއް މަސްވެރިން ކުރަމުންދާތީ ކަމަށް ފިޝަރީޒް މިނިސްޓަރު ޒަހާ ވަހީދު ވިދާޅުވެއްޖެއެވެ.
ލޭނުގެ މަސްވެރިކަމަށް ދޫކޮށްފައިވާ ލައިސެންސް ބާތިލް ކޮށްފައިވަނީ މިދިޔަ މަހުގެ 12 ވަނަ ދުވަހުއެވެ. އެހެން ނިންމީ މަގްސަދުތައް ހާސިލް ނުވާތީ ކަމަށާއި އެހެނިހެން ކަންބޮޑުވުންތައް ހުރުމުން އެކަމަށް ހައްލެއް ހޯދުމުގެ ގޮތުން ކަމަށް އޭރު މިނިސްޓްރީން ނެރެފައިވާ ބަޔާނެއްގައި ބުނެފައިވެއެވެ. ލޭނުގެ މަސްވެރިކަމުން މަސްވެރިންނަށް 310 މިލިއަން ރުފިޔާ ލިބޭއެވެ. ލައިސެންސް ފީގެ ގޮތުގައި 1.9 މިލިއަން ރުފިޔާ ފިޝަރީޒް މިނިސްޓްރީ އަށް ލިބެއެވެ.
ލޭނުގެ މަސްވެރިކަމުގެ ހުއްދަ 28 އުޅަނދަކަށް ދޫކޮށްފައިވާއިރު އެއިން ކޮންމެ އުޅަނދެއްގައި ހުންނަނީ އެންމެ ދިވެއްސެކެވެ.
މިނިސްޓަރު ވިދާޅުވީ، ލޭނުގެ މަސްވެރިކަމުގައި ގަވާއިދާ ހިލާފު ކަންތައްތަކެއް ފާހަގަވެފައިވާ ކަމަށެވެ.
ޒަހާ ވިދާޅުވީ، ލޭނުގެ މަސްވެރިކަން ކުރާ ކުންފުނިތަކަކީ ދިވެހި ކުންފުނިތަކެއް ވިޔަސް ވިޔަފާރީގެ ފައިދާ ލިބޭނީ ބިދޭސީންނަށް ކަމަށެވެ. ދިވެހިންނަށް އެ ކުންފުނިތަކަށް އެއްވެސް ބާރެއް ނުފޯރުވޭކަން މިނިސްޓަރު ފާހަގަކުރެއްވިއެވެ.
މި އަހަރުގެ އޭޕްރީލް މަހު ޔޫރަޕިއަން ޔޫނިއަންގެ މެރިޓައިމް އެފެއާރސް އެންޑް ފިޝަރީޒްގެ ވަފުދުން ރާއްޖެއަށް ކުރި ދަތުރުގައި އެބޭފުޅުން ވެސް ވަނީ ރާއްޖޭގެ ލޭނު މަސްވެރިކަމުގައި ހުރި ގަަވާއިދާ ހިލާފު ހަރަކާތްތައް ފާހަގަކޮށް އެ ކަންކަމުގެ ސަބަބުން އެއްވެސް ބާވަތެއްގެ މަސްވެރިކަން އިސްތިސްނާ ކުރުމެއް ނެތި ދިވެހިރާއްޖޭގެ މަހާއި މަހުގެ ބާވަތްތައް ވަގުތުން ވަގުތަށް ޔޫރަޕަށް އެތެރެކުރުން ހުއްޓާލާ މިންވަރަށް ލޭނު މަސްވެރިކަމުގައި މައްސަލަތައް ހުރިކަމަށް އެ ފަރާތްތުން ވެސް ވަނީ ފާހަގަ ކޮށްފައެވެ.
