މިނިސްޓަރ އަމީން މަޖިލީހަށް ހާޒިރުވުމަށް ނޯޓިސް ފޮނުވައިފި

ހެލްތް މިނިސްޓަރ އަބްދުﷲ އަމީން މަޖިލީހަށް ހާޒިރުވުމަށް ނޯޓިސް ފޮނުވައިފިއެވެ.

ހެލްތް މިނިސްޓަރ އަމީން މަޖިލީހަށް ހާޒިރުވާން ނޯޓިސް ފޮނުވާފައިވަނީ އެ މަނިކުފާނާއި ސުވާލު ކުރެއްވުމަށް ރ. މަޑުއްވަރީ ދާއިރާގެ މެމްބަރު އާދަމް ޝަރީފް، މަޖިލީހަށް ހުށަހަޅުއްވާފައިވާތީއެވެ. މިނިސްޓަރާއި ސުވާލުކުރެއްވުމަށް މެމްބަރު ޝަރީފް ހުށަހަޅުއްވާފައިވަނީ 17 ޖުލައިގައެވެ.

ވަޒީރާއި ސުވާލު ކުރެއްވުމަށް މެމްބަރު ޝަރީފް ހުށަހަޅުއްވާފައިވަނީ، އެ މެމްބަރު ނިސްބަތްވެވަޑައިގަންނަވާ ދާއިރާގައި ހިމެނޭ، ރ. މީދޫ ސިއްހީ މަރުކަޒު ހޮސްޕިޓަލަކަށް ބަދަލުކުރުމުގެ މަސައްކަތާއި ގުޅޭ ގޮތުންނެވެ.

ސިއްހީ މަރުކަޒު ހޮސްޕިޓަލަކަށް ބަދަލުކުރުމާއި ގުޅޭ 3 ސުވާލެއް ވަޒީރާއި ކުރެއްވުމަށް މެމްބަރު ވަނީ ހުށަހަޅުއްވާފައެވެ. އެއީ ރ.މީދޫ ސިއްހީ މަރުކަޒު ހޮސްޕިޓަލަށް ބަދަލުކުރުމުގެ މަސައްކަތް މިހާރު ގޮސްފައިވާ މިންވަރާއި، މި ކަމަށް މި އަހަރަށް ބޭނުންވާ ފައިސާ ހަމަޖެހިފައިވޭތޯ އާއި، ހޮސްޕިޓަލަކަށް ބަދަލުކޮށް ޚިދްމަތް ދޭން ފެށޭނީ ކޮން އަހަރަކުތޯ ބެލުމަށެވެ.

މަޖިލީހުގެ އަމީން އާންމު ފާތިމަތު ނިއުޝާ ވިދާޅުވީ، ވަޒީރަށް ދެއްވަންޖެހޭ 14 ދުވަހުގެ ނޯޓިސް އާދިއްތަ ދުވަހު، ފޮނުވާފައިވާ ކަމަށެވެ.