ފަސް ސަރަހައްދުގައި 20 މިނެޓުން ދަތުރުކޮށްފައިދެވޭހާ ދުރުމިނުގައި އެއަރޕޯޓުތައް އަޅަނީ
21 ޖުލައި 2019 | އާދީއްތަ 12:54ފަސް ސަރަހައްދު މިހާރު ވަނީ ކަނޑައަޅާފައި
ޕްލޭނިން މިނިސްޓަރު މުހައްމަދު އަސްލަމް
މީހުން ދިރިއުޅޭ ކޮންމެ ރަށަކުން ފުރައިގެން ވިހި މިނެޓުން ދަތުރުކޮށްފައި އެއާޕޯޓަށް ދެވޭހާ ދުރުމިނުގައި އެއާޕޯޓްތައް ހެދުމަކީ ސަރުކާރުގެ އަމާޒެއް ކަމަށާއި، ގައުމީ ތަރައްގީގެ ޕްލޭންގަ ސަރަހައްދުތައް ތަރައްގީ ކުރެވިގެންދާއިރު އެކަމަށް ސަމާލުކަން ދެއްވާގެން ތަރައްގީ ކުރެވިގެންދާނެ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ޕްލޭނިން މިނިސްޓްރީގެ މަސައްކަތްތަކާއި ބެހޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ގައުމީ ތަރައްގީގެ ޕްލޭންއާ ބެހޭ ގޮތުން މިނިސްޓަރު އަސްލަމް ވިދާޅުވީ ސަރުކާރުގެ ވިސްނުމަކީ ރާއްޖެ ތަރައްގީ ކުރުމަށް އެކި ސަރަހައްދު ތަކަކަށް ބަހާލައިގެން ތަރައްގީގެ މަޝްރޫއުތައް ކުރިއަށް ގެންދިއުން ކަމަށެވެ.
އެގޮތުން ފަސް ސަރަހައްދަކަށް ބަހާލައިގެން ތަރައްގީގެ މަޝްރޫއުތައް ކުރިއަށް ގެންދިއުމަށް ޕްލޭންކުރެވިފައިވާ ކަން މިނިސްޓަރ ވަނީ ފާހަގަ ކުރައްވާފައެވެ. މިނިސްޓަރ ވިދާޅުވީ ފަސް ސަރަހައްދު ތަރައްގީ ކުރެވިގެންދާއިރު، އެ ފަސް ސަރަހައްދުގެ މީހުން ދިރިއުޅޭ ކޮންމެ ރަށަކުން ފުރައިގެން ވިހި މިނިޓުން ދަތުރުކޮށްފައިދެވޭހާ، ދުރުމިނުގައި އިންޓަނޭޝަނަލް އެއާޕޯޓްތައް ހެދުމަކީ ސަރުކާރުގެ އަމާޒެއް ކަމަށެވެ. އަދި މި ކަމަކީ ގައުމީ ތަރައްގީގެ ޕްލޭންގެ ތެރޭން ކުރެވިގެންދާނެ ކަމެއްކަން މިނިސްޓަރ ވަނީ ފާހަގަ ކުރައްވާފައެވެ.
އަސްލަމް ވިދާޅުވީ ރާއްޖެ ތަރައްގީ ކުރުމުގައި މައިގަނޑު ފަސް ސަރަހައްދު ކަނޑައަޅާއިރު، އެ ރަށް ވަށައިގެން 20 މޭލުގައި ހުންނަ ރަށްތަކަކީ ސަބް ރީޖަންގެ ގޮތުގައި ކަނޑައަޅިގެންދާނެ ތަންތަން ކަމަށެވެ. އަދި 35 މޭލު ދުރުމިނުގައި ހުންނަ ރަށްތައް ސަބް އާބަން ޒޯނެއްގެ ގޮތުގައި ކަނޑައެޅިގެންދާނެ ކަމަށް މިނިސްޓަރ ވިދާޅުވިއެވެ.
ރާއްޖޭގެ ފަސް ޕްރައިމަރީ ސަރަހައްދު ފާހަގަކުރެވިފައިވާކަން ފާހަގަކުރައްވައި މިނިސްޓަރު އަސްލަމް ވިދާޅުވީ ނުވަ ސަރަހައްދެއް ސަބް ރީޖަންގެ ގޮތުގައި ފާހަގަކުރެވިފައިވާ ކަމަށެވެ.
މިނިސްޓަރު އަސްލަމް ވިދާޅުވީ ރާއްޖެ ތަރައްގީ ކުރުމުގައި ދިވެހިންނަށް އޮތް އެންމެ ބޮޑު ހުރަހަކީ އެއްތަނުން ތަނެއްތަނަށް ދަތުރުފަތުރު ކުރުމުގައި އުޅޭ ދަތިތަކާއި، ދަތުރުފަތުގެ ހަރަދު ބޮޑުވުން ކަމަށެވެ. ނަމަވެސް މިމަޝްރޫއުއާއެކު ހައްލު ލިބޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު އަސްލަމް ވިދާޅުވީ ސަރަހައްދީ ތަރައްގީގެ ޕްލޭންގެ މަސައްކަތްކުރާއިރު، މަހެއްހާ ދުވަހުގެ ތެރޭގައި އެ ޕްލޭން ނިންމާ ރައްޔިތުންގެ މަޖްލީހާ ހިއްސާކުރާނެ ކަމަށެވެ.
