ދިވެހި ޙައްޖު މިޝަންގެ އޮފީހެއް މައްކާގައި ޤާއިމުކޮށް ރަސްމީކޮށް މަސައްކަތް ފަށައިފި
21 ޖުލައި 2019 | އާދީއްތަ 02:48މިއަހަރުގެ ހައްޖު ދުވަހަކީ އޮގަސްޓު 10 ވާ ހޮނިހިރު ދުވަހު
މައްކާގައި ޤާއިމް ކުރި ދިވެހި ހައްޖު މިޝަންގެ އޮފީސް
ދިވެހި ޙައްޖު މިޝަންގެ އޮފީހެއް މައްކާގައި ޤާއިމްކޮށް ރަސްމީކޮށް މަސައްކަތް ފަށައިފި އެވެ.
ރާއްޖެ އެމްވީއަށް މައުލޫމާތު ދެއްވަމުން އިސްލާމިކް މިނިސްޓްރީގެ ސްޓޭޓް މިނިސްޓަ ޝާފިއު އަލީ ވިދާޅުވީ ދިވެހި ހައްޖު މިޝަންގެ އޮފީހެއް މައްކާގައި ޤާއިމް ކުރުމުގެ މަޤްސަދަކީ ދިވެހި ހައްޖަޖީންގެ ކަންކަން ގާތުން ބަލާ އެހީތެރިކަން ބޭނުންވާ ފަރާތަތްކަށް ސަރުކާރުގެ ފަރާތުން އެހީތެރިކަން ފޯރުކޮށްދިނުމާއި ހައްޖަށް މީހުން ގެންދާ ކުންފުނި ތަކުން މަސައްކަތް ގެންދާގޮތް މޮނިޓަރ ކުރުން ކަމަށެވެ.
ދިވެހިރާއްޖެއިން މިފަހަރު ހައްޖަށް މީހުން ގެންދިއުމަށް ސައުދީ ސަރުކާރުން 2000 ކޯޓާ ވަނީ ދީފައެވެ.
މިއަހަރުގެ ހައްޖު ދުވަހަކީ އޮގަސްޓު 10 ވާ ހޮނިހިރު ދުވަހެވެ. މިއަހަރު ރާއްޖެއިން ހައްޖަށް މީހުން ފުރަން ފެށުމަށް ހަމަޖެހިފައިވަނީ މިހިނގާ ޖުލައި މަހުގެ 21 ގައެވެ.
