ބާވެފައި ހުރި އިމާރާތްތަކުގެ ޝަކުވާ ސޯޝަލް މީޑިއާ މެދުވެރިކޮށް ހުށަ ނާޅާ، ލިޔުމުން އެކަން ހުށަހެޅުމުން މައްސަލަ ބަލަން ފަސޭހަ ވެގެންދާނެ ކަމަށް މާލެ ސިޓީ ކައުންސިލުން ބުނެފިއެވެ.
ރާއްޖެއެމްވީއާ ވާހަކަ ދައްކަވަމުން މާލެ ސިޓީ ކައުންސިލްގެ މޭޔަރު ޝިފާ މުހައްމަދު ވިދާޅުވީ ބާ ވެފައި ހުރި އިމާރާތްތަކުގެ ޝަކުވާ ލިޔުމުގެ ގޮތުގައި އަންނަނީ ވަރަށް މަދުން ކަމަށާއި އުސޫލެއްގެ ގޮތުން ޝޯޝަލް މީޑިއާ މެދުވެރިކޮށް ޝަކުވާ ހުށަނޭޅޭނެ ކަމަށެވެ. އަދި ލިޔުމުން ޝަކުވާ ހުށަހެޅުމުން ކަމާއި ގުޅޭ މުއައްސަސާތަކާއި ގުޅިގެން އެ މައްސަލަ ބަލާ، ހައްލުކުރުމުގެ ފުރުސަތު އިތުރުވެގެންދާނެ ކަމަށް ޝިފާ ފާހަގަކުރެއްވިއެވެ.
ޝިފާ ވިދާޅުވީ މިހާރު އާންމުންގެ ފަރާތުން ކައުންސިލަށް ލިޔުމުން ހުށަހަޅާފައިވާ އެންމެ ގިނަ ޝަކުވާއަކީ ބިދޭސީން ގިނަވެގެން ހިނގާ ބިގާވެ އުޅުމަށާއި މަގުތަކުގައި އެއްޗެހި ހުރުމުން ދަތިވާކަމުގެ ޝަކުވާއެވެ. އަދި ބައެއް ފަހަރު މަގުތަކުގައި އެއްޗެހި ބަހައްޓާފައި ހުރުމުން ހިނގަން އުނދަގޫވާ ކަމަށް ވެސް އެ ފަރާތްތަކުން ބުނެފައިވާ ކަމަށް ޝިފާ ފާހަގަކުރެއްވިއެވެ. އެކަމާއި ގުޅިގެން މާލެ ސިޓީ ކައުންސިލުން އެކި މުއައްސަސާތަކާއި ދެ ފަހަރަކަށް ބައްދަލު ކޮށްފައިވާނެ ކަމަށް ޝިފާ ވަނީ ވިދާޅުވެފައެވެ.
މާލެ ސިޓީ ކައުންސިލުން މިހާރު ކުރަމުން ގެންދާ ބައެއް މަސައްކަތްތަކަކީ ކާނު ސާފު ކުރުމުގެ މަސައްކަތާއި ލެޑް ލައިޓް ހަރުކުރުމުގެ މަސައްކަތާއި އުމުރު ދުވަސްވީ މީހުންނަށް ރޭމްޕް ހަދައިދިނުމާއި މަސްދޯނިތަކުގެ ކޮލެޓި އާއި މަހުގެ ކޮލެޓީ ބެލުމުގެ މަސައްކަތް ކަމަށް ޝިފާ ބުންޏެވެ.
ޖުލައި މަހުގެ 24 ވަނަ ދުވަހު މާލޭ ސިޓީ ކައުންސިލުން ހުޅުމާލެ ރައްޔިތުންނާއި ބައްދަލުކުރުމަށް ނިންމާފައިވަނީ އަންނަ އަހަރަށް މުނިސިޕަލް ކަންކަމާއި ކައުންސިލުން ހަވާލުވުމަށް ނިންމާފައިވާތީ ކަމަށާއި މި ބައްދަލުވުމުގައި އެޗްޑީސީ އިން ވެސް ބައިވެރިވާނެ ކަމަށް ޝިފާ ވިދާޅުވިއެވެ.
ސިޓީ ކައުންސިލްގެ އިތުރުން މިނިސްޓްރީ އޮފް ޕްލޭނިންގ އެންޑް އިންފްރާސްޓްރަކްޗަރއިން ވެސް ވަނީ ބާވެފައިވާ އިމާރާތްތަކުގެ ޝަކުވާ ހުށައެޅުމުން ފިޔަވަޅުއަޅާނެ ކަމަށް އިލްތިމާސްކޮށްފައެވެ.
ބާ އިމާރާތްތަކުގެ ޝަކުވާތައް ޝޯޝަލް މީޑިއާގައި އާންމުން ހިއްސާ ކުރަމުންދާއިރު ގެއެއްގެ ބެލްކަނިން ބެރިއެއް ވެއްޓި ދެ މީހަކަށް ވަނީ އަނިޔާ ލިބިފައެވެ. އެގޮތުން މިދިޔަ މަހު އަނިޔާވެފައިވަނީ ހ. ރުއްދޮށުގޭ ބެލްކަނިން ބެރިއެއް ވެއްޓިގެންނެވެ.
