އެމްއެމްޕީއާރްސީ ހިޔާނަތް 1.2 ބިލިއަންއަށްވުރެ އިތުރުވާނެ: މެމްބަރު އަބްދުﷲ
19 ޖުލައި 2019 | ހުކުރު 06:42ތަހުގީގު ކުރިއަށް ގެންދިޔަ ވަރަކަށް އިތުރުކަންކަން ދަނީ ތިލަވަމުން
ބާރަށު ދާއިރާގެ މެމްބަރު އަހުމަދު އަބްދުﷲ
އެމްއެމްޕީއާރްސީ ހިޔާނަތް 1.2 ބިލިއަންއަށްވުރެ އިތުރުވާނެ ކަމަށާއި، ތަހުގީގު ކުރިއަށް ގެންދިޔަ ވަރަކަށް އިތުރުކަންކަން ތިލަވަމުންދާ ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެމްބަރު އަބްދުﷲ ވިދާޅުވީ ކުރީގެ ރައީސް އަބްދުﷲ ޔާމީންއާ 18 ވަނަ ރައްޔިތުންގެ މަޖިލީހުގެ ބައެއް މެމްބަރުންނާއި، އެސަރުކާރުގެ ބައެއް ބޭފުޅުންނަށް ކޮރަޕްޝަންގެ ތުހުމަތުގެ އިނގިލި ދިއްކުރެވޭއިރު، ގިނަ ކަންތައްތަކެއް އަދިވެސް ސިއްރުވެފައިވާ ކަމަށެވެ.
މެމްބަރު އަބްދުﷲ ވިދާޅުވީ 19 ވަނަ ރައްޔިތުންގެ މަޖިލިސް ތަފާތުވާނެ ކަމަށާއި، އެމަޖިލީހުން މަސައްކަތް ކުރާނީ ރައްޔިތުންގެ ހައްގުގައި ކަމަށެވެ. އެގޮތުން ރައްޔިތުންގެ ހަޒާނާއަށް ހިޔާނަތްތެރިވެފައިވާ ބަޔަކު ހަމަރީތިކޮށް އުޅެން ދޫކޮށްލުމަކީ މުސްތަގުބަލަށް ދެއްކޭ ވަރަށް ގޯސް މަގެއް ކަމަށެވެ.
ކޮރަޕްޝަންގެ މައްސަލަތައް ބަލަން އުފައްދާފައިވާ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ ކޮމިޝަނަށް މަޖިލީހުން ފުރިހަމަ ބާރުދިނީ ދައުލަތުން ގެއްލުނު ފައިސާ ހޯދުމަށް މިނިވަންކަމާއެކު މަސައްކަތް ކުރެވޭ ގޮތް މަގުފަހި ކުރުވަން ކަމަށް މެމްބަރު ވިދާޅުވިއެވެ.
މެމްބަރު އަބްދުﷲ ވިދާޅުވީ ހިޔާނާތަށް 1.2 ބިލިއަން އޭ ތުހުމަތު ކުރެވުނު ނަމަވެސް ހިޔާނާތުގެ ފައިސާ މިއަށްވުރެ އިތުރުވާނެ ކަމަށާއި، މައްސަލަ ތަހުގީގު ކުރިވަރަކަށް ސިއްސައިގެންދާވަރުގެ ކަންކަން ތިލަ ވަމުން އަންނަ ކަމަށެވެ.
މެމްބަރު އަބްދުﷲ ވިދާޅުވީ 19 ވަނަ މަޖިލީހުގައި މަސައްކަތް ކުރަމުންދަނީ ދައުލަތުގެ ހުރިހާ މުއައްސަސާތަކުން ވެސް ވީހާ ވެސް ބޮޑަކަށް ކޮރަޕްޝަނާ ފަސާދައިގެ އަމަލުތައް ކުޑަކުރުވާ އަދި ޖަވާބުދާރީވަނިވި ނިޒާމެއްގެ ތެރެއިން މަސައްކަތް ކުރެވޭނެ މާހައުލެއް ގާއިމްކުރުމަށް ކަމަށެވެ. އެހެންކަމުން މިކަމަށް ހުރިހާ މުއައްސަސާތަކުން ވެސް އެއްބާރުލުންދޭންޖެހޭ ކަމަށް މެމްބަރު ވިދާޅުވިއެވެ.
މެމްބަރު އަބްދުﷲ ވިދާޅުވީ މުއައްސަސާތަކަށް ރައްޔިތުންގެ އިތުބާރު ގެއްލިގެން ދިއުމަކީ ކުޑަ ކަމެއް ނޫން ކަމަށާއި، ސަރުކާރެއް ކާމިޔާބު ވުމަށް އެންމެ މުހިންމީ ރައްޔިތުންގެ އިތުބާރު ކަމަށެވެ. އަދި ހިޔާނާތުގައި ފީނެން އޮތް އެންމެ ބޮޑަށް ފީނާ އިހުމާލުވި ހުރިހާ ފަރާތްތަކާ މެދު ފިޔަވަޅު އަޅާނެ ކަމަށާއި، ރައްޔިތުންގެ ހައްގު ރައްޔިތުންނަށް މިސަރުކާރުން ހޯދާދޭނެ ކަމަށް މެމްބަރު ވިދާޅުވިއެވެ.
