މަޖިލީހަށް ދޮގު މައުލޫމާތު ދޭނަމަ ޖިނާއީ ދައުވާކުރަން ފޮނުވާނަން: ރައީސް ނަޝީދު
ބައެއް މުއައްސަސާތަކުން ވަޑައިގަންނަވާ ބޭފުޅުން މަޖިލީހުގައި ސާފުބަހުން ވާހަކަ ނުދައްކާ ކަމުގެ ޝަކުވާ ވަނީ ލިބިވަޑައިގެންފައި
މަޖިލީހުގެ ރައީސް މުހައްމަދު ނަޝީދު
މުއައްސަސާތަކުގެ ވެރިން މަޖިލީހަށް ދޮގު މައުލޫމާތު ދެއްވަމުން އަންނަ ކަމުގެ ޝަކުވާ ލިބިވަޑައިގެންފައިވާ ކަމަށާއި، ދޮގު މައުލޫމާތު ދޭ ފަރާތްތަކުގެ މައްސަލަ ތަހްގީގް ކުރައްވާނެ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ މަޖިލިސް ޖަލްސާ ނިންމަވާލައްވާ ވާހަކަފުޅު ދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ ބައެއް މުއައްސަސާތަކުން ވަޑައިގަންނަވާ ބޭފުޅުން މަޖިލީހުގައި ސާފުބަހުން ވާހަކަ ނުދައްކާ ކަމުގެ ޝަކުވާ، ބައެއް ކޮމިޓީތަކުގެ މުގައްރިރުން އެ މަނިކުފާނު އަރިހުގައި ވިދާޅުވެފައިވާ ކަމަށެވެ. މުއައްސަސާތަކުގެ ވެރިން އިތުރުފުޅު ހައްދަވާ ކަމަށް ޝައްކު ކުރެވިފައިވާ ކަމަށް އެމަނިކުފާނު ވިދާޅުވި އެވެ.
ރައީސް ނަޝީދު ވިދާޅުވީ މަޖިލީހަށް ވަޑައިގެން އިތުރުފުޅު ހެއްދެވުމަކީ ޖިނާއީ ކުށެއް ކަމަށާއި، އެއްވެސް ބޭފުޅަކު މަޖިލީހަށް ދޮގު މައުލޫމާތު ދެއްވާކަން ފާހަނގަކުރެއްވިއްޖެނަމަ ތަހްގީގް ކުރައްވާނެ ކަމަށެވެ. އެއްވެސް މުއައްސަސާއެއްގެ ވެރިއެއްގެ ފަރާތުން އެފަދަ ކަމެއް ފާހަނގަކުރެވިއްޖެނަމަ، ދައުވާ ކުރުމަށް ޕްރޮސެކިއުޓަރ ޖެނެރަލަށް ފޮނުއްވާނެ ކަމަށް އެމަނިކުފާނު ވިދާޅުވި އެވެ.
މަޖިލީހުގެ 17 ކޮމިޓީއަށް އެކި މުއައްސަސާތަކުގެ ވެރިން ހާޒިރުކޮށް އަންނަނީ ސުވާލުކުރަމުންނެވެ. އެގޮތުން ރާއްޖޭގެ ތާރީޚުގައި ހިންގި އެންމެ ބޮޑު ކޮރަޕްޝަން ކަމަށްވާ އެމްއެމްޕީއާރްސީ ކޮރަޕްޝަނުގެ މައްސަލަވެސް މަޖިލީހުގެ ކަމާއި ގުޅުން ހުރި ކޮމިޓީތަކުން އަންނަނީ ބަލަމުންނެވެ. އަދި އެކަމާއި ގުޅުން ހުރި މުއައްސަސާތަށްވެސް އަންނަނީ ކޮމިޓީތަކަށް ހާޒިރުކުރަމުންނެވެ.
