މަގާމުން ބަދަލުނުކުރެވޭނެ އެއްވެސް ފަރާތެއް ނުހުންނާނެ : ޔައުގޫބް
މިހެން ވިދާޅުވީ މުސާރަތައް ބޮޑު ކުރި ސަބަބަކަށް ޑިޕާޓްމަންޓްތަކުގެ އިސްވެރިން ބަދަލު ނުކުރެވޭނެ ކަމަށް ބުނި ބުނުމަށް ގޮންޖައްސަވަމުން
ދާންދޫ ދާއިރާގެ މެމްބަރު ޔައުގޫބް އަބްދުﷲ
މަގާމުން ބަދަލުނުކުރެވޭނެ އެއްވެސް ފަރާތެއް ނުހުންނާނެ ކަމަށް ދާންދޫ ދާއިރާގެ މެމްބަރު ޔައުގޫބް އަބްދުﷲ ވިދާޅުވެއްޖެއެވެ. މެމްބަރު ވިދާޅުވީ، މަގާމަކުން މީހަކު ބަދަލު ކުރުމަކީ އެއްވެސް އުނދަގުލެއް ނެތި ކުރެވޭނެ ކަމެއް ކަމަށެވެ.
ޔައުގޫބް މިހެން ވިދާޅުވީ، މުސާރަތަށް ބޮޑު ކުރި ސަބަބަކަށް ޑިޕާޓްމަންޓްތަކުގެ އިސްވެރިން ބަދަލު ނުކުރެވޭނެ ކަމަށް ބުނި ބުނުމަށް ގޮންޖައްސަވަމުންނެވެ.
މެމްބަރު މިިހެން ވިދާޅުވީ، މަޖިލީހުގެ ސްޓޭޓް އޯންޑް އެންޓަރ ޕްރައިޒެސް (އެސްއޯއީ) ކޮމިޓީން ބަލަމުން އަންނަ އައިލެންޑްއޭވިއޭޝަންގެ ޑިޕާޓްމެންޓްތަކުގެ ވެރިން ގެ މުސާރަތައް ގަވާއިދާ ޚިލާފަށް ބޮޑު ކުރި މައްސަލަ އަށް އިޝާރާތް ކުރައްވަމުންނެވެ.
އައިލެންޑްއޭވިއޭޝަން އިން ވަނީ ފިނޭންސް މނިނިސްޓްރީ އަށާއި ޕްރައިވަޓައިޒޭޝަން ބޯޑަށާއި މަޖިލީހަށް މުޅިން ދޮގު މައުލޫމާތު ދީ އޮޅުވާފައިކަމަށް ވެސް ޔައުގޫބް ވިދާޅުވިއެވެ.
ފިނޭންސް މިނިސްޓްރީއިން ހެދި އޮޑިޓް ރިޕޯޓަކުން އައިލެންޑްއޭވިއޭޝަން ގެ ބައެއް ވެރިންގެ މުސާރަތައް ބޮޑު ކުރީ ގަވާއިދާ ޚިލާފަށްކަން އެނގޭ ކަމަށާ އަދި ގަވާއިދާއި ޚިލާފަށް ބޮޑު ކޮށްފައިވާ މުސާރަތައް އަލުން އަނބުރާ ހޯދުމަށް އަންގާފައިވާކަމަށް ވެސް ޔައުގޫބް ވިދާޅުވިއެވެ.
އައިލެންޑްއޭވިއޭޝަންގެ މެނޭޖިންގް ޑިރެކްޓަރ އާއި ޑެޕިއުޓީ މެނޭޖިންގް ޑިރެކްޓަރ ގެ މުސާރަ ގާވާއިދާ ޚިލާފަށް ބޮޑު ކުރި ކަމުގެ ވާހަކަތަކެއް މީސްމީޑިއާގައި ފެތުރުމާއެކު އައިލެންޑްއޭވިއޭޝަން އިން ވަނީ މި ތުހުމަތުތައް ދޮގު ކޮށްފައެވެ. އެ ކުންފުނިން އެސްއޯއީ ކޮމިޓީއަށް ފޮނުއްވި ސިޓީއެއްގައި އެމްޑީ އާއި ޑީއެމްޑީގެ މުސާރަ ބޮޑު ނުކުރި ނަމަވެސް، ކުންފުނީގެ ޑިޕާޓްމެންޓްތަކުގެ އިސްވެރިންގެ މުސާރަތައް ބޮޑު ކުރިކަމަށްވެއެވެ.
