ސިޓީގައި ބޭނުންކޮށްފައިވާ އިބާރާތްތަކުން މުއައްސަސާތަކަށް ގާނޫނާއި ޚިލާފަށް ސުޕްރީމް ކޯޓުން ބާރު ފޯރުވާ މިންވަރު އެނގިގެންދާ ކަމަށް ވިދާޅުވި
މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ
ޖުޑީޝަލް ސާރވިސް ކޮމިޝަން ގެ ދަށަށް ޑިޕާރޓްމެންޓް އޮފް ޖުޑިޝަލް އެޑްމިނިސްޓްރޭޝަން ބަދަލުކުރުމާއި މެދު ހިތްހަމަ ނުޖެހުން ފާޅުކޮށް، ސިޓީއެއް ފޮނުވާފައިވާ ކަމަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ބުދަ ދުވަހުގެ ޖަލްސާގައި ވިދާޅުވެއްޖެއެވެ.
ސިޓީ އަށް އިޝާރާތް ކުރައްވަމުން މެމްބަރު ވިދާޅުވީ، މަޖިލީހުގައި މިވަގުތު ހިނގަމުންދާ ބިލަކާއި މެދު މަޖިލީހަށް ބާރާއި ނުފޫޒު ފޯރުވުމުގެ މަސައްކަތްތައް ކުރެވެމުންދާ މިންވަރު އެނގިގެންދާ ކަމަށެވެ.
މި ސިޓީގައި ބޭނުންކޮށްފައިވާ އިބާރާތްތަކުން މުއައްސަސާތަކަށް ގާނޫނާއި ޚިލާފަށް ސުޕްރީމް ކޯޓުން ބާރު ފޯރުވާ މިންވަރު އެނގިގެންދާ ކަމަށާއި މިފަދަ ކަމަކަށް އެއްވެސް ޖާގައެއް ދެވިގެން ނުވާނެ ކަމަށް ވެސް އިމްތިޔާޒް ފާހަގަ ކުރެއްވިއެވެ. ކޯޓުތައް ހެދުމުގެ ގާނޫނާއި ބަޖެޓު ވެސް ދެނީ މަޖިލީހުން ކަމަށް ވުމުން މަޖިލީހުގެ ވާޖިބުތައް އަދާ ކުރުމަށް ހުރަސް އެޅުމަށް ކުރަމުންދާ މަސައްކަތްތައް މެމްބަރު ވަނީ ކުށްވެރި ކުރައްވާފައެވެ.
އިމްތިޔާޒް މިހެން ވިދާޅުވީ ރައީސް ޔާމީން ގެ ސަރުކާރުގައި ހިއުމަން ރައިޓްސް ކޮމިޝަން ގެ ބާރުތައް ނިގުޅައިގަތުމަށް ސުޕްރީމް ކޯޓުން ނިންމެވި ނިންމެވުމަށް އަލި އަޅުވާލަމުންނެވެ. މެމްބަރުން ބަހުސް ކުރައްވަމުން ގެންދެވީ، މަޖިލީހުގެ ޖުޑީޝިއަރީ ކޮމިޓީއިން ރާއްޖޭގެ ކޯޓުތަކާއި ބެހޭ ބިލަށް ހުށަހަޅުއްވާފައިވާ އިސްލާހުތައް ދިރާސާކޮށް ހުށަހަޅާފައިވާ ރިޕޯޓާއި ބެހޭގޮތުންނެވެ.
އިމްތިޔާޒް ފަހުމީއަކީ މަޖިލީހުގެ ޖުޑީޝިއަރީ ކޮމިޓީގެ މުގައްރިރެވެ.
