އިންޑިޔާ ކަނޑުގައި ބޮޑު ދާ އެޅުން ހުއްޓުވުމަށް މަޖިލީހަށް ގަރާރެއް

އިންޑިޔާ ކަނޑުގައި ބޮޑު ދާ އެޅުން ހުއްޓުވާ ދެމެހެއްޓެނިވި މަސްވެރިކަން ކުރުމަށް ގޮވާލާ މަޖިލީހަށް ގަރާރެއް ހުށަހަޅައިފިއެވެ.

މި ގަރާރު މަޖިލީހަށް ހުށަހެޅުއްވީ ކަނޑިތީމު ދާއިރާގެ މެމްބަރު އަބްދުﷲ ޝަހީމް އަބްދުލް ހަކީމްއެވެ.

މި ގަރާރަކީ މަސްވެރިކަމާއި ބެހޭ ބިލަށް ގެންނަން ޖެހޭ ބަދަލުތަކުގެ މައިގަނޑުތަކާއި ގުޅޭ އިތުރު ބަހުސްތަކެއް ކުރިއަށް ގެންދިއުމުގެ ގޮތުން ހުށަހެޅުނު ގަރާރެކެވެ.

މެމްބަރު ޝަހީމް ހުށަހެޅުއްވި ގަރާރުގައި ވަނީ އިންޑިޔާ ކަނޑުގައި ކުރެވޭ މަސްވެރިކަމުގައި ބޮޑުދާ ޖަހައިގެން ރީނދޫ އުރަހަ ކަންނެލީގެ މަސްވެރިކަން އާންމުވެފައިވާތީ، އެކަމުގެ ސަބަބުން ކަންނެލީގެ ސްޓޮކް މަދުވެ، ދިވެހިރާއްޖޭގެ އިގްތިސާދަށާއި، މަސްވެރިކަމުގެ ސިނާއަތަށް ގެއްލުންވަމުން އަންނަ ކަމަށެވެ.

މަސްވެރިކަމުގައި ދިވެހިރާއްޖެއިން ގެންގުޅޭ ދެމެހެއްޓެނިވި އުސޫލްތައް ކުރިއަރުވައި އެ އުސޫލްތަކާ ޚިލާފަށް އިންޑިޔާ ކަނޑުގައި މަސްވެރިކަން ކުރުން މަނާކުރުމަށާއި، އިންޑިޔާ ކަނޑުގައި ބޮޑުދާ ޖަހައިގެން މަސްވެރިކަން ކުރުން މަނާ ކުރުމަށާއި، ދެމެހެއްޓެނިވި އުސޫލުން ކުރެވޭ މަސްވެރިކަން ކުރިއެރުވުމުގެ ގޮތުން ހުށަހެޅުނު ގަރާރެއް ކަމަށެވެ.

އިނގިރޭސި ވިލާތުގެ ބްލޫ މެރިން ފައުންޑޭޝަންއިން 2019 ވަނަ އަހަރުގެ ޖޫން މަހު އެކުލަވާލައި އާންމުކުރި ރިޕޯޓްގައި އިންޑިޔާ ކަނޑުގެ ރީނދޫ އުރަހަ ކަންނެލީގެ މަސްވެރިކަމުގެ ހާލަތާއި މެދު ކަންބޮޑުވުން ފާޅުކޮށްފައިވާ ކަމަށް ގަރާރުގައި ވަނީ ބުނެފައެވެ.

އެ ގޮތުން އެ ރިޕޯޓްގައި ރީނދޫ އުރަހަ ކަންނެލީގެ މަސްވެރިކަމުގައި މަސްވެރިކަން ކުރާ ގައުމުތަކުން ދެމެހެއްޓެނިވި މަސްވެރިކަމުގެ އުސޫލްތަކަށް ބެލުމެއް ނެތި މަސްވެރިކަން ކުރުމާއި، މަސްވެރިކަމާއި ގުޅޭ ގޮތުން އެކުލަވާލެވިފައި ހުންނަ ބައިނަލް އަގްވާމީ އުސޫލްތަކާއި، ގައުމުތަކުގެ ގާނޫނުތައް އެކަށީގެންވާ ގޮތުގައި ތަންފީޒު ނުކުރެވުމާއި، އެ އުސޫލްތަކާ އެއްގޮތަށް އަމަލުކުރަމުން ގެންދާކަން ކަށަވަރުކުރެވޭނެ ނިޒާމެއް ވެސް ގާއިމްކުރެވިފައިނުވާ ކަމަށް ގަރާރުގައި ވަނީ ބުނެފައެވެ.

ގަރާރުގައި ބުނެފައިވަނީ މިހާރު އިންޑިޔާ ކަނޑުގައި މަސްވެރިކަން ކުރަމުން ގެންދާ އުސޫލްތައް ބަދަލުކޮށް، މަސްވެރިކަން ކުރާ މިންވަރު އެކަށީގެންވާ މިންވަރަށް ދަށް ނުކުރެވޭނަމަ، ރީނދޫ އުރަހަ ކަންނެލީގެ ސްޓޮކް ވަރަށް ބޮޑަށް ދަށްވެ،މުޅި ރާއްޖޭގެ އިގްތިސާދަށް އޭގެ ނޭދެވޭ އަސަރު ކުރާނޭ ކަމަށެވެ. އަދި

މަސްވެރިކަން ކުރާ މިންވަރު މިހާރަށް ވުރެ ދަށްކުރުމަށްޓަކައި، މަސްވެރިކަން ކުރުމުގައި ދިވެހިރާއްޖެއިން އިންޑިއަން އޯޝަން ޓޫނާ ކޮމިޝަން (އައިއޯޓީސީ) ގެ އިރުޝާދުތަކަށް ފުރިހަމައަށް ތަބާވުމަށާ އިންޑިއާ ކަނޑުގައި ބޮޑުދާޖަހައިގެންނާއި އޮޔާދާ ބޮޑުދާ ޖަހައިގެން މަސްވެރިކަން ކުރުމަކީ މަނާކަމެއް ކަމުގައި ހަމަޖެއްސުމަށާއި، އެކަން ތަންފީޒްކުރެވޭނޭ އުސޫލްތައް އެކަށައެޅުމަށް ދިވެހިރާއްޖެއިން ވަކާލާތު ކުރުމަށާ އިންޑިއަން އޯޝަން ޓޫނާ ކޮމިޝަންއިން އެއްބަސްވެފައިވާ ގޮތުގެ މަތިން ބޮޑުދާ ޖަހައިގެން މަސްވެރިކަންކުރާ އުޅަނދުތަކުން ދޫކުރާ އޮޔާދާ އޮއިވާލި ކަނދުފަތި ހުއްޓުވުމަށް ދިވެހިރާއްޖެއިން ވަކާލާތު ކުރުމަށާ، ދިވެހިރާއްޖޭގެ ދޮށީގެ މަސްވެރިކަމުގައި ބޭނޭ ކުދި ރީނދޫއުރަހަ ކަންނެލި މަދުކުރުމަށް އޮއިވާލި ކަނދުފަތިތައް ކައިރިން މަސްވެރިކަން ކުރުމުގެ ބަދަލުގައި އައިންމަތީ މަސްއައިނުން މަސްވެރިކަން ކުރުމަށް ހިތްވަރުދިނުމަށް މިނިސްޓްރީ އޮފް ފިޝަރީޒް އެގްރިކަލްޗަރ އެންޑް މެރިން ރިސޯސަސްއިން ޕްރޮގްރާމްތައް އެކުލަވާލައި ހިންގުން ވެސް ހިމެނެއެވެ.

އަދި އިންޑިއާ ކަނޑުގައި ކުރާ ކަނޑުމަހުގެ މަސްވެރިކަމާ ގުޅުންހުރި ހަރަކާތްތައް ބަލައި، ކަނޑުމަހުގެ މަސްވެރިކަމަކީ ދެމެހެއްޓެވި އުސޫލުން ކުރެވޭ މަސްވެރިކަމެއްކަން ކަށަވަރުކުރުމަށް އަޅަންޖެހޭ އެންމެހައި ފިޔަވަޅުތައް އެޅުމަށް އިންޑިއަން އޯޝަން ޓޫނާ ކޮމިޝަން (އައި.އޯ.ޓީ.ސީ) އަށް ގޮވާލައި، އެކަން ތަންފީޒް ކުރުމަށްޓަކައި ދިވެހިރާއްޖެއިން ބާރުއެޅުމަށް މަޖިލިސް އިގުރާރްވާ ކަމަށް ބުނެފައިވެއެވެ.

މި ކަންތައް ތަންފީޒް ކުރުމަށްޓަކައި ދިވެހިރާއްޖެއިން ބާރުއެޅުމަށް މަޖިލިސް އިގުރާރުވާ ކަމަށް ގަރާރުގައި ވަނީ ބުނެފައެވެ.