އައްޑޫ އަށާއި ފުވައްމުލަކަށް ކުރެއްވި ދަތުުރުފުޅު ނިންމަވާލެއްވުމަށް ފަހު ނާއިބް ރައީސް މާލެ ވަޑައިގެންފި
14 ޖުލައި 2019 | އާދީއްތަ 20:34ހުޅުމީދޫ ސިއްހީ މަރުކަޒަށް ޒިޔާރަތްްކުރެއްވި
ނައިބް ރައީސް ފުވައްމުލަކުން ފުރާވަޑައިގަތުމުގެ ކުރިން މޭޔަރު ފަލާހު ޝަރީފްއާ އެކު
ރައީސުލްޖުމްހޫރިއްޔާގެ ނާއިބު ފައިސަލް ނަސީމް ފުވައްމުލަކު ސިޓީއަށާއި އައްޑޫ ސިޓީ ގެ ބައެއް ރަށްރަށަށް ކުރެއްވި ދަތުރުފުޅު ނިންމަވާލެއްވުމަށްފަހު އާދިއްތަ ދުވަހުގެރޭ މާލެ ވަޑައިގެންފިއެވެ.
ނާއިބް ރައީސްގެ ދަތުރުފުޅަކީ އައްޑޫ ސިޓީ ހުޅުމީދޫ އަށް ވަޑައިގެން އެރަށުގެ ސިއްހީީ މަރުކަޒަށް ޒިޔާރަތްކުރެއްވިއެވެ. އެރަށު މަގުހެދުމުގެ މަޝްރޫއު ކުރިޔަށްދާ ސަރަހައްދަށް ޒިޔާރަތްކުރައްވައި އެމަސައްކަތް ކުރިޔަށްދާ ގޮތް ވެސް ނާއިބް ރައީސް ބައްލަވާލެއްވިއެވެ.
އަދި އައްޑޫސިޓީ ހިތަދޫއަށް ވަޑައިގެން ހިތަދޫގެ ބައެއް ސްކޫލްތަކާއި ރީޖަނަލް ހޮސްޕިޓަލާއި ޕަވަރހައުސްފަދަ ރަށުގެ މުހިންމު ތަންތަނަށް ޒިޔާރަތްކުރައްވައި އެތަންތަނުގެ މުވައްޒަފުންނާއި އެމަނިކުފާނު ބައްދަލުކުރެއްވިއެވެ.
މީގެ އިތުރުން އައްޑޫ ސިޓީ ކައުންސިލާއި ބައްދަލުކުރައްވައި މަޝްވަރާކުރައްވައި ރަށުގެ ހާލަތާއި ކުރިއަށްދާ މަޝްރޫޢުތަކާއި ދިމާވާ މައްސަލަތަކާއި ބެހޭ ގޮތުން މައުލޫމާތު ހޯއްދެވިއެވެ.
ނާއިބް ރައީސް ފައިސަލްގެ މިދަތުރުފުޅުގައި އެމަނިކުފާނުގެ އުފަން ރަށް ފުވައްމުލަކަށް ވަޑައިގެން ފުވައްމުލަކު އަތޮޅު ތައުލީމީ މަރުކަޒާ އަދި އެރަށު ސްކޫލުތަކުގެ ސީނިއަރ މެނޭޖްމަންޓާ ބައްދަލުކުރައްވައި ތައުލީމީ ދާއިރާއިން ފުވައްމުލަކު ސްކޫލުތަކުގެ ހުރި ކަންބޮޑުވުންތަކާއި ކުރިޔަށް ރޭވިފައިވާ ކަންކަމާއި ބެހޭގޮތުން މަޝްވަރާކުރައްވާފައިވެއެވެ.
ފުވައްމުލަކު ސިޓީ ކައުންސިލާ ބައްދަލުކުރައްވައި ފުވައްމުލަކުގެ ތަރައްޤީއަށް ކުރެވޭ މަސައްކަތްތަކާއި އަދި ކުރިޔަށް ރޭވިފައިވާ ޕްލޭންތަކާއި ހުރި ގޮންޖެހުންތަކާ ބެހޭގޮތުން އެމަނިކުފާނު ވަނީ މަޝްވަރާކުރައްވާފައެވެ.
މީގެއިތުރުން ނާއިބް ރައީސް ވަނީ ފުވައްމުލަކު ހޮސްޕިޓަލަށް ޒިޔާރަތްކުރައްވައި އެތަނުގައި ތިބި ބަލިމީހުންނާއި ބައްދަލުކޮށްލަވައި އެމީހުންގެ ޙާލުއަހުވާލު ބައްލަވައިލައްވައިފައެވެ.
އަދި ފުވައްމުލަކު މަގުހެދުމުގެ މަސައްކަތްކުރިޔަށް ދާ ސަރަހައްދަށް ޒިޔާރަތްކުރައްވައި އެމަސައްކަތް ކުރިޔަށްދާގޮތްވެސް މިދަތުރުފުޅުގައި ބައްލަވައިލައްވައިފައި ވެއެވެ.
