އައިއޯއައިޖީ 2019: ދިވެހި ދިދަ އުފުލާނީ ބާސްކެޓް ކުޅުންތެރިޔާ ޒަބީރު

އިންޑިއަން އޯޝަން އައިލޭންޑް ގޭމްސް (އައިއޯއައިޖީ) ގެ ހުޅުވުމުގެ ރަސްމިއްޔާތުގައި ދިވެހިރާއްޖޭގެ ކޮންޓިޖެންޓްގެ ދިދަ އުފުލާ އެތުލީޓަކަށް ބާސްކެޓްބޯޅަ ކުޅުންތެރިޔާ އަހުމަދު ޒަބީރު ހަމަޖައްސައިފިއެވެ.

އާދީއްތަ ދުވަހު ހަވީރު ރައީސް އޮފީހުގައި ބޭއްވި ރަސްމިއްޔާތެއްގައި ގައުމީ ދިދަ ޒަބީރުއާ ހަވާލު ކޮށްދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުއެވެ.

މި ރަސްމިއްޔާތުގައި އެމްއޯސީން ވަނީ ރައީސް ސޯލިހުއަށް އައިއޯއައިޖީގައި ވާދަކުރާ ރާއްޖޭގެ ޓީމުގެ އޮފިޝަލް ކިޓް އަރުވައިފައެވެ.

އައިއޯއައިޖީ 2019 ގައި ދިދަ އުފުލާ އެތުލީޓު ހޮވާފައިވަނީ އެމްއޯސީގެ ބޯޑުންނެވެ. އެންމެ ފަހުން ބޭއްވި އައިއޯއައިޖީ ގޭމްސްގައި ދިދަ އުފުލާ އެތުލީޓު ހޮވާފައިވަނީ އާންމުންނަށް ހުޅުވާލައިގެން އެސްއެމްއެސް މެދުވެރިކޮށެވެ.

އިއޯއައިޖީގެ ހުޅުވުމުގެ ރަސްމިއްޔާތުގައި 2015 ވަނަ އަހަރު ދިވެހި ދިދަ އުފުލީ ރާއްޖޭގެ އެންމެ ބާރު ދުވުންތެރިޔާ ހަސަން ސާއިދުއެވެ. އެފަހަރު ސާއިދުއަށް ވެސް ދިދަ ހަވާލުކޮށްފައިވަނީ ރައީސް އޮފީހުގައި ބޭއްވުނު ހާއްސަ ރަސްމިއްޔާތެއްގައެވެ.

އައިއޯއައިޖީގައި ބައިވެރިވާ ދިވެހި ކޮންޓިންޖެންޓު ފުރުމަށް ހަމަޖެހިފައިވަނީ އަންނަ ބުދަ ދުވަހު ހެނދުނެވެ.