ކިއުރިއޯސިޓީ ސްޓްރީމް އިން ދެ ހާ އަށް ވުރެ ގިނަ ފީޗާ ފިލްމާއި ޑޮކިއުމެންޓަރީ ފެނިގެންދާނެ
މީޑިއާނެޓްގެ މާކެޓިންގް އޮފިސަރ އިސްމާއިލް މާއިޒް
މީޑިއާނެޓުން މުޅިން އަލަށް ޗެނަލް ކިއުރިއޯސިޓީ ސްޓްރީމް ތައާރަފްކޮށްފިއެވެ.
އާދިއްތަ ދުވަހު މީޑިއާނެޓް ހެޑް އޮފީހުގައި ނޫސްވެރިންނަށް މައުލޫމާތުދެއްވަމުން މީޑިއާނެޓްގެ މާކެޓިންގް އޮފިސަރ އިސްމާއިލް މާއިޒް ވިދާޅުވީ މި ޗެނަލްއިން ދެ ހާ އަށް ވުރެ ގިނަ ފީޗާ ފިލްމާއި ޑޮކިއުމެންޓަރީ ފެނިގެންދާނެ ކަމަށެވެ. ކިއުރިއޯސިޓީ ސްޓްރީމްއަކީ ބެލުންތެރިންގެ މައުލޫމާތު މުއްސަދިކުރުމަށްޓަކައި ސައިންސް އާއި ޓެކްނޮލޮޖީ، އިޖްތިމާއީ، ލައިފްސްޓައިލް އަދި ތިމާވެށީގެ ކޮންޓެންޓްތައް ބަލާލުމަށް ހުރިހާ އުމުރުފުރާއެއްގެ ބޭފުޅުންނަށް ވެސް އެކަށީގެންވާނެ ޗެނަލްއެއް ކަމުގައި މާއިޒް ވިދާޅުވިއެވެ.
މާއިޒް ވިދާޅުވި މީޑިއާނެޓްގެ ކޭބަލް އަދި ހިޓްސް ބެލުންތެރިންނަށް ޗެނަލް ކިއުރިއޯސިޓީ ސްޓްރީމް މި ފެށޭ އޮގަސްޓް މަހުގެ އެއް ވަނަ ދުވަހުގެ ނިޔަލަށް ހިލޭ ލިބިގެންދާނެކަމުގައެވެ. އަދި ފެމެލީ ނުވަތަ ފެމެލީ އަށް ވުރެ މަތީ ޕެކޭޖްތައް ބޭނުންކުރައްވާ ފަރާތްތަކަށް ޗެނަލް ނަންބަރު 827 އިން ފެނިވަޑައި ގަންނަވާނެ ކަމަށް އޭނާ ވިދާޅުވި އެވެ.
މާއިޒް ވިދާޅުވީ މީޑިއާނެޓުން ކުރިއަށް އޮތްތަނުގައި އިތުރު އާ ޗެނަލްތައް ތައާރަފް ކުރުމުގެ ވިސްނުމެއް ގެންގުޅުއްވާ ކަމަށާއި މީޑިއާނެޓްގެ ޕްރޮގްރާމްތަކާ ބެހޭ މައުލުމާތު މީޑިއާނެޓްގެ ސޯޝަލް މީޑިއާ އަދި އީމެއިލް މެދުވެރިކޮށް ލިބިގެންދާނެ ކަމުގައެވެ.
ކިއުރިއޯސިޓީ ސްޓްރީމްއަކީ ޑިސްކަވަރީ ޗެނަލް އުފެއްދި ފަރާތްތަކުން އިތުރު އާ ކޮންޓެންޓް ގެނަސް ދިނުމަށްޓަކައި ސްޓްރީމިން ޗެނަލްއެއްގެ ގޮތުގައި 2015 ވަނަ އަހަރު ތައާރަފް ކޮށްފައިވާ ޗެނަލްއެކެވެ.
