ބުރާސްފަތި 05 ޑިސެންބަރު 2019
09 ދޮށަ
1441 ރަބީޢުލްއާޚިރު 08
ފަތިސް 04:41
އިރުއަރާ 05:58
މެންދުރު 12:00
އަސްރު 15:21
މަޣްރިބް 17:55
އިޝާ 19:12
ކުޅިވަރު - ސާޑިއޯ މާނޭ

މާނޭ ހޯދުމަށް ރެއާލުން މަސައްކަތް ކުރަނީ

  • ލިވަޕޫލާއެކު މާނޭ ހަދާފައިވާ އެއްބަސްވުން ހަމަވާނީ 2023 ވަނަ އަހަރު

ލީވާން އަލީ
MrLeevaan

ކ. މާލެ 14 ޖުލައި 2019 | އާދީއްތަ 11:25 6,911

ސާޑިއޯ މާނޭ - ރޮއިޓަރސް

ލިވަޕޫލަށް ކުޅެމުން އަންނަ ސެނަގާލްގެ ފޯވާޑް ސާޑިއޯ މާނޭ ހޯދުމަށް ރެއާލް މެޑްރިޑުން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

ސްޕެއިންގެ ނޫސްތަކުން ބުނީ، ކުރިޔަށް އޮތް ސީޒަނަށް އަމާޒުކޮށް މާނޭ ހޯދުމަށް ރެއާލްއިން މަސައްކަތް ކުރަމުން އަންނަ ކަމަށެވެ.

ނަމަވެސް އެ ނޫހުން ބުނީ، އުމުރުން 27 އަހަރުގެ މާނޭ ވިއްކާލަން ލިވަޕޫލުން ދެކޮޅު ކަމަށާއި، މާނޭވެސް ކްލަބް ދޫކޮށްލަން މިވަގުތު ބޭނުން ނުވާ ކަމަށެވެ.

ރެއާލްގެ އިތުރުން ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މާނޭ ހޯދުމަށް މަސައްކަތް ކުރަމުން ކަމަށް ރިޕޯޓްތައް ބުނެއެވެ. އޭގެ ތެރޭގައި ޖަރުމަން އަދި އިޓަލީގެ ކްލަބްތައް ވެސް ހިމެނޭ ކަމަށް އެ ރިޕޯޓްތަކުގައިވެއެވެ.

މިދިޔަ އަހަރުގެ ނޮވެމްބަރު މަހު ލިވަޕޫލްއާއެކު މާނޭ ހަދާފައިވާ އެއްބަސްވުން 2023 އަހަރުގެ ނިޔަލަށް އާކޮށްފައިވާއިރު، އޭނާ ބޭނުން ވަނީ އެއްބަސްވުން ނިމެންދެން ކްލަބުގައި މަޑުކުރަން ކަމަށް ރިޕޯޓްތައް ބުނެއެވެ.

ސައުތްހެމްޕްޓަން ދޫކޮށްލުމަށް ފަހު 2016 ވަނަ އަހަރު 34 މިލިއަން ޕައުންޑަށް ފަސް އަހަރު ދުވަހުގެ އެއްބަސްވުމެއްގެ ދަށުން މާނޭ ލިވަޕޫލް އަށް ބަދަލުވިއިރު، އޭނާ އަކީ އޭރު އެފްރިކާގެ ތާރީހުގައި އެންމެ އަގުބޮޑު ކުޅުންތެރިޔާއެވެ.

ލިވަޕޫލް އަށް މިދިޔަ ސީޒަނުގައި ކުޅުނު 50 މެޗުގައި 26 ލަނޑު ކާމިޔާބު ކޮށްފައިވާ މާނޭ ވަނީ އޭނާ މިހާތަނަށް އެޓީމަށް ކުޅުނު 123 މެޗުގައި 59 ލަނޑު ކާމިޔާބުކޮށްފަ އެވެ.

ލިވަޕޫލްއާއެކު ޔުއެފާ ޗެމްޕިއަންސް ލީގު މިދިޔަ ސީޒަނުގައި ހޯދި މާނޭ ވަނީ 2016 ވަނަ އަހަރުގެ ސީޒަނުގައި ލިވަޕޫލްގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ.

އެފްރިކާ ސަރަހައްދުގެ އެންމެ ކާމިޔާބު އެއް ކުޅުންތެރިޔާ މާނޭ ވަނީ ސެނެގަލް ގައުމީ ޓީމަށް މިހާތަނަށް ކުޅުނު 60 މެޗުގައި 16 ލަނޑު ކާމިޔާބު ކޮށްފައެވެ.

އެންމެ ފަހުން އަޕްޑޭޓް ކުރީ: 5 މަސް ކުރިން | ރިވިއު ކުރީ: ހުޝާމް މުހަޢްމަދް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.

ކޮމެންޓް