"ހާއުފާ" އީދު ޝޯގައި ބައިވެރިވާނެ އިތުުރު މިއުޒިޝަނުންނާއި އެކު ސޮއިކޮށްފި
13 ޖުލައި 2019 | ހޮނިހިރު 06:10މި ރަސްމިއްޔާތުގައި އީދު ޝޯގައި ބައިވެރިވާ މަޝްހޫރު ފަންނާނުންނާއި އެކުވެސް ވަނީ ސޮއިކޮށްފައި
ހައިޑްސް އިން ގްރެވިޓީ ބޭންޑްއާއި އެކު ސޮއި ކުރަނީ
މިއަހަރުގެ އަޟްހާ އީދު ފާހަގަކުރުމަށް ހޯރަފުށީ ޔޫތް ޑިވެލޮޕްމެންޓް ސޮސައިޓީ (ހައިޑްސް) އާއި ހޯރަފުށީ ކައުންސިލްގެ އިން އިންތިޒާމްކޮށްގެން ބާއްވާ ހާއުފާ އީދު ޝޯގައި ބައިވެރިވާނެ އިތުރު މިއުޒިޝަނުންނާއިއެކު ސޮއިކޮށްފި އެވެ.
ހުކުރު ދުވަހު ބޭއްވުނު ސޮއި ކުރުމުގެ ރަސްމިއްޔާތުގައި ހައިޑްސް އިން ވަނީ 2016 ވަނަ އަހަރުގެ މޯލްޑިވިއަން އައިޑޮލް ގެ އެންމެ ގަދަ ފަހެއްގައި ހިމެނުނު މުހައްމަދު މުއައްޒިން ނައީމް ހިމެނޭ ރޮކް މެޓަލް ބޭންޑް، ގްރެވިޓީ އާއި އެކުވެސް ސޮއި ކޮށްފައެވެ.
މި ޝޯގައި އިތުރު މަޝްހޫރު ފަންނާނުން ބައިވެރިވާން ހަމަޖެހިފައިވާއިރު މަޝްހޫރު ލަވަ ކިޔުންތެރިޔާ މުހައްމަދު އަބްދުލް ޣަނީ (ތޭރަވާ) ގެ އިތުރުން ލަވަކިޔުންތެރިޔާ އަޝްފާ މުހައްމަދާއިއެކު ވެސް ވަނީ އެއްބަސްވުމެއްގައި ސޮއިކޮށްފައެވެ.
ހުކުރު ދުވަހު ބޭއްވުނު ސޮއި ކުރުމުގެ ރަސްމިއްޔާތުގައި ޕްރިންޓިންގް ޕާޓްނަރެއްގެ ގޮތުގައި ހައިޑްސް އިން ވަނީ އެމް ސެވަން އާއި އެކު ވެސް ސޮއި ކޮށްފައެވެ.
ހޯރަފުށި، އުލިގަން އަދި ތުރާކުނަށް ޚާއްސަ ކޮށްގެން އީދު ވިލޭރޭގައި ބާއްވާ ހާއުފާ އީދު ޝޯގެ ބްރޯޑްކާސްޓިންގް މީޑިއާ ޕާޓްނަރ ގެ ގޮތުގައި ރާއްޖެޓީވީ ހަމަޖެހިފައިވާއިރު އޮންލައިން ޕާޓްނަރެއްގެ ގޮތުގައި ހަމަޖެހިފައިވަނީ ރާއްޖެއެމްވީ އެވެ.
