އުފަން ދުވަހު ޖޭޑެން ހުޅުވީ ހިލޭ ކާއެއްޗެހި ދޫކުރާ ތަނެއް
ޖޭޑެން ހުޅުވި އާ ކުންފުންޏަކީ ވީގަން ކާއެއްޗެހި މީހުންނަށް ހިލޭ ދޫކުރާ ތަނެއް
ޖޭޑެން ސްމިތް
ހޮލީވުޑްގެ މަޝްހޫރު ތަރި ޖޭޑެން ސްމިތް އޭނާގެ 21 ވަނަ އުފަންދުވަހު ކޮށްފައިވަނީ އެހެންމީހުންނާއި ހިލާފަށް، ވަރަށް ތަފާތު ކަމެކެވެ.
ޖޭޑެން ވަނީ އޭނާގެ އުފަންދުވަހު ވަރަށް ހާއްސަ ކަމަކާއި ގުޅޭ ކުންފުންޏެއް އުފައްދައިފައެވެ. އަދި އެއީ ގިނަ ބަޔަކަށް ލިބިގެންދިޔަ އުފާވެރި ހަބަރެކެވެ. ސަބަބަކީ، ހޮލީވުޑްގައި ގިނަ ބައެއްގެ ތަރުހީބު ލިބިފައިވާ ތަރި ވިލް ސްމިތްގެ ދަރި ޖޭޑެން ހުޅުވި އާ ކުންފުންޏަކީ ވީގަން ކާއެއްޗެހި މީހުންނަށް ހިލޭ ދޫކުރާ ތަނެކަށްވުމުންނެވެ.
"އައި ލަވް ޔޫ ރެސްޓްރޯންޓް" ގެ ނަމުގައި އުފެއްދި މި ކުންފުނި އުފެއްދުމަށްފަހު ޖޭޑެންގެ އުފަންދުވަހު އޭނާ ވަނީ "ޓްރަކް" އަކުން ކާއެއްޗެހި ދޫކުރާ ވީޑިއޯ އެއް އިންސްޓަގްރާމްގައި ހިއްސާ ކޮށްފައެވެ.
ޖޭޑެން ބުނެފައިވަނީ އެ "ޓްރަކް" އަކީ އަދި އެކަމުގެ ފެށުން ކަމަށެވެ. އަދި ކުރިއަށް ވަރަށް ގިނަ ކަންތައްތައް ކުރުމަށް ހިޔާލުކޮށްފައިވާ ކަމަށް އޭނާ ބުނެފައިވެއެވެ.
ޖޭޑެން އަކީ ފިލްމް ކުޅުމުގެ އިތުރުން ލަވަ ކިޔުންތެރިއެއްވެސްމެއެވެ. އޭނާ އެންމެ ފުރަތަމަ ފެނިގެން ގޮސްފައިވަނީ ވިލް ސްމިތް އާއެކު "ދަ ޕަރސޫޓް އޮފް ހެޕިނެސް" އިންނެވެ.
