ބިދޭސީ މީހާ މަރުވީ ބޮޑު ޖަމްބޯ ބޭގެއް ވެއްޓިގެން: ފުލުހުން
ބިދޭސީ މީހާގެ ބޮލަށް ވެއްޓުނީ އެންމެ ބަސްތާއެއް ނޫން، އެތައް ބަސްތާތަކެއް އަޅާފައި ހުރި ބޮޑު ޖަމްބޯ ބޭގެއް
ބިދޭސީ މީހާގެ ބޮލަށް ވެއްޓުނު ޖަމްބޯ ބޭގް
ހުޅުމާލޭގައި ޖާހް އިންވެސްޓްމަންޓް ހަދަމުން އަންނަ އިމާރާތުގައި ބުދަ ދުވަހު ހިނގި ހިތާމަވެރި ހާދިސާގައި މަރުވެފައިވާ ބިދޭސީ މީހާގެ ބޮލަށް ވެއްޓުނީ އެންމެ ބަސްތާއެއް ނޫން ކަމަށާއި އެތައް ބަސްތާތަކެއް އަޅާފައި ހުރި ބޮޑު ޖަމްބޯ ބޭގެއް ކަމުގައި ފުލުހުން ބުރާސްފަތި ދުވަހު ބުނެފިއެވެ.
ފުލުހުން ބުނެފައިވާގޮތުގައި ކުރިން ސިމެންތި ބަސްތާއެއް ވެއްޓުނު ކަމަށް ދެންނެވުނީ މައުލޫމާތުގެ ކުށަކުން ކަމަށާއި، ބިދޭސީ މީހާގެ ބޮލަށް ވެއްޓުނީ ބައިވަރު ސިމެންތި ބަސްތާތަކެއް އަޅާފައި ހުރި ބޮޑު ޖަމްބޯ ބޭގެއް ކަމަށް ފުލުން ބުންޏެވެ.
ބިދޭސީމީހާ މަރުވެފައިވަނީ ޖަމްބޯބޭގް ވެއްޓުމުގެ ސަބަބުން ލިބުނު އަނިޔާތަކާ ގުޅިގެންނެވެ. ބުދަ ދުވަހުގެ ހަވީރު ހިނގި މި ހާދިސާގައި ބިދޭސީ މީހާ ހޮސްޕިޓަލަށް ގެންދިޔަ އިރުވެސް ވަނީ މަރުވެފައެވެ.
މި ހަފްތާގެ ތެރޭގައި ހަމަ އެ އިމާރާތުގެ ހަތްވަނަ ފަންގިފިލާއިން ލިފްޓެއްގެ ވާގަނޑު ކަނޑައިގެންގޮސް އެ ލިފްޓާއެކު ވަނީ ބިދޭސީމީހަކު ވެއްޓިފައެވެ. މިދިޔަ ޖޫން މަހު ހެންވޭރު ގެއެއްގެ ބެލްކަނީ ދެމީހަކު ވެއްޓި ބޮޑެތި އަނިޔާތަކެއް ލިބިފައިވާއިރު 2018 ވަނަ އަހަރު އިމާރާތްކުރުމުގެ މަސައްކަތެއް ކުރަމުން ދަނިކޮށް އެތަނުން ވެއްޓުނު ސިމެންތި ގޯންޏަކުން ޖެހި ހަތް އަހަރުގެ ކުޑަކުއްޖެއް ވަނީ ނިޔާވެފައެވެ.
ޖާހު އިންވެސްޓްމެންޓަކީ ކުރީގެ ޖައުސާ ޓްރޭޑިންގ މޯލްޑިވްސްއެވެ.
