އިމާރާތަކުން ވެއްޓުނު ސިމެންތި ގޯންޏަކުން ޖެހި ބިދޭސީއަކު މަރުވެއްޖެ
އަނިޔާ ލިބި މަރުވެފައިވަނީ އެ ސައިޓުގައި މަސައްކަތް ކުރަމުންދިޔަ 24 އަހަރުގެ ބަނގްލަދޭޝް ފިރިހެނެއް
ފުލުހުން ބަންދުކޮށްފައިވާ ސަރަހައްދެއް
އިމާރާތަކުން ވެއްޓުނު ސިމެންތި ގޯންޏަކުން ޖެހި ބިދޭސީއަކު މަރުވެއްޖެ ކަމަށް ފުލުހުން ބުނެފިއެވެ.
ބިދޭސީ މީހާ މަރުވެފައިވަނީ ހުޅުމާލެ ސެންޓްރަލް ޕާކު ކައިރި ބަގީޗާ ހިންގުމުގައި ޖާހް އިންވެސްޓްމެންޓުން ހަދަމުންދާ އިމާރާތެއްގެ މަތިން އޭނާގެ ބޮލަށް ސިމެންތި ގޯންޏެއް ވެއްޓިގެން ކަމަށް ފުލުހުން ބުނެފައިވެއެވެ.
މި ހާދިސާގައި އަނިޔާ ލިބި މަރުވެފައިވަނީ އެ ސައިޓުގައި މަސައްކަތް ކުރަމުންދިޔަ 24 އަހަރުގެ ބަނގްލަދޭޝް ފިރިހެނެކެވެ.
ޑޮކްޓަރުންނާއި ހަވަލާދީ ފުލުހުން މައުލޫމާތު ދީފައިވާ ގޮތުގައި ހޮސްޕިޓަލަށް ގެންދެވުނު އިރުވެސް އޭނާ ވަނީ މަރުވެފައެވެ.
ކަމާއި ގުޅޭ ފަރާތްތަކާ ގުޅިގެން މި މައްސަލަ އިތުރަށް ތަހުގީގު ކުރަމުން ދާ ކަމަށް ފުލުހުން ބުނެފައިވެއެވެ.
2018 ވަނަ އަހަރު ވެސް މާލޭގައި މިފަދަ ހާދިސާއެއް ވަނީ ހިނގާފައެވެ. އެގޮތުން، އިމާރާތްކުރުމުގެ މަސައްކަތެއް ކުރަމުން ދަނިކޮށް އެތަނުން ވެއްޓުނު ސިމެންތި ގޯންޏަކުން ޖެހި ހަތް އަހަރުގެ ކުޑަކުއްޖެއް ވަނީ މިދިޔަ ޑިސެމްބަރު މަހު ނިޔާވެފައެވެ.
އެ ހާދިސާގައި އިހުމާލުވި ކުންފުންޏަށް އިމާރާތް ކުރުމަށް ދީފައިވާ ހުއްދަތައް ހިފެހެއްޓި ނަމަވެސް ފަހުން ވަނީ ހުއްދަ އަލުން ދީފައެވެ.
