ތަފާތު އެކި ކަންބޮޑުވުންތަކާއެކު 107 ފަނޑިޔާރުންގެ ސޮއި ހިމެނޭ ޕެޓިޝަނެއް ޖުޑިޝަލް ސަރވިސް ކޮމިޝަން (ޖޭއެސްސީ) އަށް ހުށަހެޅުމުން، އެ ކޮމިޝަނުން ފަނޑިޔާރުންގެ ޖަމިއްޔާއާ ބައްދަލުކޮށްފިއެވެ.
ޖުޑިޝަލް ސަރވިސް ކޮމިޝަނުން އަންގާރަ ދުވަހުގެ ރޭ ކުރި ޓުވީޓެއްގައި ބުނެފައިވަނީ އެ 107 ފަނޑިޔާރުން ހުށަހެޅި ފެޓިޝަންގައި ހުރި ކަންބޮޑުވުންތައް ބަލާ، ކޮމިޝަންގެ ކަމާއިބެހޭ ކޮމިޓީން ފަނޑިޔާރުންގެ ޖަމިއްޔާއާ ބައްދަލުކޮށްފައިވާ ކަމަށެވެ. އެ ބައްދަލުވުމުގައި ކުރި މަޝްވަރާ ކުރި ކަންތައްތަކެއް އެ ކޮމިޝަންގެ ޓުވީޓުގައި ހާމަކޮށްފައެއް ނުވެއެވެ.
107 ފަނޑިޔާރުން މައިގަނޑުގެ ގޮތުގައި ޕެޓިޝަންގައި ހިމަނާފައިވަނީ މައިގަނޑު ގޮތެއްގައި ހަ ކަމެކެވެ. އެއީ މުސާރައިގެ އޮނިގަނޑަށް ބަދަލު ގެނައުމާއި ބޯހިޔާވަހިކަން ލިބޭނެ މަގު ފަހިކޮށްދިނުމާއި މެޖިސްޓްރޭޓުންނަށް ކޯޓު ފަޓުލޫނުގެ އެލަވެންސް ދިނުމުގެ އިތުރުން މެޖިސްޓްރޭޓުންނަށް ފޯން އެލަވަންސް ހަމަޖައްސައިދިނުމާއި ފަނޑިޔާރެއްގެ ނުރުހުމުގައި ފަނޑިޔާރަކު މަސައްކަތް ކުރާ ކޯޓު ނޫން އެހެން ކޯޓަކަށް ބަދަލު ނުކުރުމެވެ.
މީގެ އިތުރުން ފަނޑިޔާރުންގެ ގާނޫނުގެ ފަސްވަނަ އިސްލާހު ގެނައުމުގެ ގާނޫނަކީ ގާނޫނު އަސާސީގެ 141 ވަނަ މާއްދާގެ (ނ) އާއި ފަނޑިޔާރުންގެ ގާނޫނުގެ (ހ) އާއި (ށ)ގެ މަގުސަދާއި ހިލާފު އިސްލާހެއް ކަމަށް ގަބޫލު ކުރެވޭ ކަމަށް ވެސް އެ ޕެޓިޝަންގައިވެއެވެ.
ޖޭއެސްސީގެ ރައީސް އަބްދުﷲ އަރީފަށް ރައްދުކުރައްވައި ހުށަހެޅި އެ ޕެޓިޝަންގައި މުސާރައާ ބެހޭ ގޮތުން ބުނެފައިވަނީ ފަނޑިޔާރުންނަށް މިހާރު ދެމުން އަންނަ މުސާރައާއި އިނާޔަތަކީ 28 ޑިސެމްބަރ 2010 ގައި ރައްޔިތުންގެ މަޖިލީހުން ފާސްކޮށްފައިވާ އޮނިގަނޑާ އެއްގޮތަށް 2010 އޮގަސްޓް މަހުގެ 10 ވަނަ ދުވަހުން ފެށިގެން ދެމުން އަންނަ މުސާރައެއް ކަމަށާއި އޭގެ ފަހުން ނުވަ ވަރަކަށް އަހަރު ވެފައިވާއިރު ދިރިއުޅުމުގެ އާންމު ހަރަދުތަކާއި އެހެން ހަރަދުތަކުގެ އިތުރުން ޒަރޫރީ ބޭނުންތަކުގެ އަގުތައް ވަނީ އިންތިހާއަށް ބޮޑުވެފައި ކަމަށެވެ.
ބޯހިޔާވަހިކަމާއި ގުޅޭ ގޮތުން އެ 107 ފަނޑިޔާރުން ބުނީ މިނިވަން މުއައްސަސާތަކާއި، ދައުލަތުގެ އެހެނިހެން އިދާރާތަކާއި ކުންފުނިތަކުގައި މަސައްކަތް ކުރާ މުވައްޒަފުންނަށް ކަނޑައެޅިފައިވާ ހާއްސަ ސްކީމެއްގެ ދަށުން ބޯހިޔާވަހިކަން ހަމަޖެހޭނެ ފުރުސަތުތަކެއް ހުރި ނަމަވެސް އަދުލު އިންސާފު ގާއިމުކުރުމުގެ ބާރުގައި މަސައްކަތް ކުރާ ފަރާތްތަކަށް އެފަދަ އިންތިޒާމެއް ހަމަޖެހިފައި ނުވާ ކަމަށެވެ.