އަނިޔާވެރިކަމާ ދެކޮޅު ނަމަވެސް އެއްވެސް ފުލުހަކާމެދު ނުހައްޤުން ފިޔަވަޅެއް ނާޅާނެ ކަމަށް މިނިސްޓަރ އޮފް ހޯމް އެފެއާޒް، ޝެއިހް އިމްރާން އަބްދުﷲ ވިދާޅުވެއްޖެއެވެ.
ޑްރަގް އެންފޯސްމެންޓް ޑިޕާޓްމެންޓްގެ ފުލުހުންތަކެއް މީހަކު ހައްޔަރުކުރުމުގެ ތެރޭގައި އެ މިހާއަށް އަނިޔާކުރި މައްސަލައިގައި ގިނަ ބައެއްގެ ފާޑުކިއުން ފުލުހުންނަށް އަމާޒުވެފައިވާއިރު، އެކަމާ ގުޅޭގޮތުން އަންގާރަ ދުވަހު އިމްރާން ކުރެއްވި ޓްވީޓެއްގައި ވިދާޅުވީ، މި ސަރުކާރުން އެއްވެސް ވަރަކަށް އަނިޔާވެރިކަމާއި ނާއިންސާފުން ހިނގާ ކަންކަން ތަހައްމަލު ނުކުރާނެ ކަމަށެވެ. އަދި އަނިޔާވެރިކަމާ ކިތަންމެ ދެކޮޅު ނަމަވެސް އެއްވެސް ފުލުހަކާމެދުވެސް ނާއިންސާފުން އެއްވެސް ފިޔަވަޅެއް ނާޅާނެ ކަމަށް މިނިސްޓަރ ވިދާޅުވި އެވެ.
އޭގެ އިތުރުން، އެހާދިސާ ހިނގިތާ ބައިގަޑިއިރު ތެރޭގައި ޕޮލިސް ކޮމިޝަނަރ މުހައްމަދު ހަމީދު އެކަމަށް ހަރުކަށި ފިޔަވަޅު އަޅާފައިވާ ކަމަށާއި، ދެފުއް ފެންނަ ގޮތަށް ކަންކަން ހިންގުމަށް އިސްކަންދެއްވާނެ ކަމަށް އިމްރާން ވިދާޅުވި އެވެ.
އިމްރާން އެހެން ވިދާޅުވެފައިވާއިރު، މި އޮޕަރޭޝަން ހިންގުމުގެ ތެރޭގައި ތުހުމަތު ކުރެވޭ ބަނގްލަދޭޝް މީހާގެ ގައިގާ ތަޅާ އަނިޔާ ކުރާ މަންޒަރު ދައްކުވައިދޭ ވީޑިއޯއެއް އާއްމުވެފައިވާތީ އެފަދަ އަމަލުތަކަކީ ދިވެހި ފުލުހުންގެ 'ކޯޑް އޮފް އެތިކްސް' އަދި 'ކޯޑް އޮފް ކޮންޑަކްޓް' އާ ހިލާފު އަމަލުތަކެއް ކަމަށާއި، އެ މައްސަލަ ބެލުމަށްޓަކައި ޖިނާއީ ތަހުގީގެއް ހިންގުމަށް ހާއްސަ ޓީމެއް އެކުލަވާލާފައިވާނެ ކަމަށް ފުލުހުން ބުނެފައިވެއެވެ.
އޭގެ އިތުރުން، ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑް އާއި މިނިވަން މުއައްސަސާތަކުން މި މައްސަލަ ތަހުގީގު ކުރަމުން ދަނިކޮށް އެ އަމަލުތައް ހިންގީ ވަކި ބައެއް ކަމަށް ބުނެ ސޯޝަލް މީޑިއާގައި ފުލުހުންގެ މުއައްޒަފުންތަކެއްގެ ފޮޓޯ ޖަހާ، އެ މުވައްޒަފުންނަށް އެކި ގޮތްގޮތުން އިންޒާރުދީ ބިރުދައްކަމުންދާތީ، ސައްހަ ނޫން މައުލޫމާތު ދައުރު ނުކުރުމަށްވެސް ފުލުހުން ވަނީ އިލްތިމާސް ކޮށްފައެވެ.
