ކަކުލުހުޅު ބަދަލުކުރުމުގެ އޮޕްރޭޝަން ޓްރީޓޮޕާއި މެޑިކާގައި ފަށައިފި
7 ޖުލައި 2019 | އާދީއްތަ 12:47ފުރަތަމަ އޮޕަރެޝަން ކޮށްފައިވަނީ އާދިއްތަ ދުވަހު
އައިޖީއެމްއެޗް
ސަރުކާރުން ޚަރަދުކޮށްގެން ކުރިއަށް ގެންދާ ޓޯޓަލް ނީ ރިޕްލޭސްމަންޓް ސަރޖަރީ ( ކަކުލު ހުޅު ބަދަލު ކުރުމުގެ އޮޕަރޭޝަން) މަޝްރޫއޫގެ ފުރަތަމަ އޮޕަރޭޝަންތައް އާދިއްތަ ދުވަހު މެޑިކާ އަދި ޓްރީޓޮޕް ހޮސްޕިޓަލްގައި ކާމިޔާބުކަމާއި އެކު ކޮށްފިއެވެ.
އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބުނީ ސިއްޚީ ޚިދުމަތުގައި އަމިއްލަ ފަރާތްތަކުގެ ބައިވެރިވުން އިތުރުކުރުމަކީ ރައްޔިތުންނަށް އެކަމުގެ ސަބަބުން ލުއިފަސޭހަކަން ލިބިގެންދާނޭ ކަމެއްކަމުގައި ވާތީ، މިއަދު މި ފެށުނު މަޝްރޫއަކީ ސިއްޚީ ދާއިރާއިން ރައްޔިތުންނަށް ލުއި ފަސޭހަކަމާއިއެކު އަވަސް ޚިދުމަތެއް ހޯދައި ދިނުމަށް ސަރުކާރުން ކުރަމުން އަންނަ ގިނަ މަސައްކަތްތަކެއްގެ ފެށުން ކަމަށެވެ.
"އައިޖީއެމްއެޗަކީ މުޅި ރާއްޖޭގެ އާބާދީއަށް ޚިދުމަތްދެމުން އަންނަ، ސިއްޚީ ޚިދުމަތުގެ މައި ނާރެސް ކަމުގައި ވީހިނދު، މި ހޮސްޕިޓަލް މިހާރުވެސް ހިނގަމުން އަންނަނީ ފުލް ކެޕޭސިޓީގައި" އައިޖީއެމްއެޗުން ބުންޏެވެ.
މި މަޝްރޫއަކީ ސަރުކާރުން އިސްނަގައިގެން، ރައްޔިތުންނަށް ފޯރުކޮށްދޭ ސިއްޚީ ޚިދުމަތް އަވަސްކުރުމަށްޓަކައި އާސަންދައާއި އައިޖީއެމްއެޗްގެ ފަރާތުން މެޑިކާ އަދި ޓްރީޓޮޕް ހޮސްޕިޓަލާއި އެކު ކޮންޓްރެކްޓް އުސޫލުން ކުރިއަށް ގެންދެވޭ މަޝްރޫއުއެއް ކަމަށް އައިޖީއެމްއެޗުން މައުލޫމާތު ދެއެވެ.
