ބާރުތައް ބަދަލުކުރުމުގެ މަރުހަލާ ހާމަކަން ބޮޑު ގޮތެއްގައި ކުރިއަށް ގެންދަން އެދެފި
5 އޮކްޓޯބަރު 2018 | ހުކުރު 11:25ބާރުތައް ބަދަލު ކުރުމާ ގުޅޭ ބައްދަލުވުންތައް ހުޅުވާލަން ގޮވާލާފައިވޭ
ސެޕްޓެމްބަރު 24، 2018: ނާކާމިޔާބީ ގަބޫލުފުޅު ކުރެއްވި ޕްރެސް ކޮންފަރެންސަށްފަހު ޕޯޑިއަމް ދޫކުރައްވައި ރައީސް ޔާމީން ވަޑައިގަންނަވަނީ.
އާ ސަރުކާރާ ވެރިކަން ހަވާލުކުރުމުގެ މަރުހަލާ ހާމަކަން ބޮޑު ގޮތެއްގައި ކުރިއަށް ގެންދިއުމަށް ޓްރާންސްޕޭރެންސީ އިންޓަނޭޝަނަލްއިން ގޮވާލައިފިއެވެ.
ޓްރާންސްޕޭރެންސީ އިންޓަނޭޝަނަލުން ހުކުރު ދުވަހު ބުނެފައި ވަނީ ވެރިކަން ބަދަލު ކުރުމުގެ މަރުހަލާގެ ސައްހަކަމާއި އިންސާފުވެރިކަން ކަށަވަރު ކުރުމަށްޓަކައި ދެފުށް ފެންނަ ގޮތަށް އެ މަރުހަލާގެ ކަންކަން ކުރިއަށް ގެންދަންޖެހޭ ކަމަށެވެ. ވެރިކަމުގެ ބާރުތައް ބަދަލު ކުރުމާ ގުޅޭ ގޮތުން ބާއްވާ ބައްދަލުވުންތަކުގައި ސިޔާސީ ޑީލުތަކާއި ސިއްރު އެއްބަސްވުންތަކަށް ފުރުސަތު ނުދިނުމުގެ ގޮތުން އެ ބައްދަލުވުންތައް ހުޅުވާލައިގެން ކުރިއަށް ގެންދިއުމަށް ޓްރާންސްޕޭރެންސީ އިންޓަނޭޝަނަލުން ވަނީ ގޮވާލާފައެވެ.
ޓްރާންސްޕޭރެންސީން ބުނީ އެފަދަ ބައްދަލުވުންތައް ރެކޯޑުކޮށް، ޔައުމިއްޔާ ބަލަހައްޓަންވާނެ ކަމަށާއި ކޮންމެ ބައްދަލުވުކަށްފަހު މީޑިއާތަކަށް މައުލޫމާތު ދީ، ޕްރެސް ކޮންފަރެންސް ބޭއްވުމަށް އެދޭ ކަމަށެވެ.
މިދިޔަ މަހުގެ 23ގައި ބޭއްވި ރިޔާސީ އިންތިހާބު ބޮޑު ފަރަގަކުން ކާމިޔާބު ކުރެއްވި އިބްރާހިމް މުހައްމަދު ސޯލިހު (އިބޫ)އާ ވެރިކަން ހަވާލު ކުރުމަށްޓަކާ ޑިރެކްޓާ ޖެނެރަލް އޮފް ޓްރާންސިޝަންގެ މަގާމަށް އަހުމަދު ލަތީފް (ސީވީޑް ލަތީފް) ވަނީ އައްޔަން ކުރައްވާފައެވެ. އަދި އޭނާއަށް ހާއްސަ އޮފީހެއް ސަރުކާރުން ވަނީ ހަމަޖައްސާފައެވެ.
ވެރިކަން ބަދަލުވުމުގެ މަރުހަލާގެ ކަންކަން ކުރުމަށް ސިޔާސީ ގޮތުން އައްޔަން ކުރައްވާފައިވާ އިސް ބޭފުޅަކީ ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދެވެ. އޭގެ އިތުރުން ހާއްސަ ދާއިރާތަކަށް އިބޫގެ ފަރާތްޕުޅުން ކަނޑައަޅާފައިވާ ކޮމެޓީތަކުން ދަނީ މިނިސްޓަރުންނާއި ދައުލަތުގެ މިނިވަން މުއައްސަސާތަކާ ބައްދަލުކޮށް، މަޝްވަރާތައް ކުރިއަށް ގެންދަމުންނެވެ.
