އިންފޮމޭޝަން ކަމިޝަނަރުގެ އޮފީހަށް އީސީ ހާޒިރު ކުރަނީ މާދަމާ ހެނދުނު 10:00އަށް
7 ޖުލައި 2019 | އާދީއްތަ 13:09އާންމު އަޑުއެހުން ބޭއްވުމަށް ނިންމާފައިވަނީ އިންފޮމޭޝަން ކަމިޝަންގެ އޮފީހުގައި
އިލެކްޝަންސް ކަމިޝަންގެ މެމްބަރު އަހުމަދު އަކްރަމް
މުންޑޫ ޕެޓިޝަނުގެ މައްސަލައިގައި އިންފޮމޭޝަން ކަމިޝަނަރުގެ އޮފީހަށް އިލެކްޝަންސް ކަމިޝަން(އީސީ)ހާޒިރު ވާން އެދިފައިވަނީ ހޯމަ ދުވަހުގެ ހެނދުނު 10:00އަށް ކަމަށް އެކަމިޝަނުން ބުނެފިއެވެ.
އެކަމިޝަންގެ ތަރުޖަމާނު އަހުމަދު އަކްރަމް ވިދާޅުވީ އާންމު އަޑުއެހުމެއް ބޭއްވުމަށް ކަނޑައަޅައި އިންފޮމޭޝަން ކަމިޝަންގެ އޮފީހުން އީސީ ހާޒިރުވާން އެދިފައިވާ ކަމަށެވެ.
ނިމިދިޔަ ރައްޔިތުންގެ މަޖިލީހުގެ އިންތިޚާބާއި ދިމާކޮށް އީސީއިން ދާއިރާތައް ކަނޑައެޅުމުގެ ކުރިން ގަމު ދާއިރާގައި ހިމެނޭ މުންޑޫ، އިސްދޫ ދާއިރާއަށް ބަދަލު ކޮށްދިނުމަށް އެރަށު ކައުންސިލުން އިލެކްޝަންސް ކަމިޝަނަށް ސިޓީއެއް ފޮނުވިއެވެ. އީސީއިން ނިންމީ އެކަމަށް ގޮތް ކަނޑައެޅުމަށް އެކަމިޝަންގެ މެމްބަރުންގެ ލަފައެއް ހޯދުމަށެވެ.
މުންޑޫ ކައުންސިލުން އެދިފައި ވަނިކޮށް ކައުންސިލުން އެދުނު ގޮތާއި ޚިލާފަށް އިސްދޫ ދާއިރާއަށް ބަދަލުވާން ރައްޔިތުން ބޭނުން ނުވާ ކަމަށް އެދި އީސީއަށް ޕެޓިޝަނެއް ހުށައެޅިއެވެ. އީސީއިން ވެސް ނިންމީ ރައްޔިތުން އެދުނު ގޮތަށް ގަމު ދާއިރާގައި މުންޑޫ ހިމެނޭ ގޮތަށް ބޭއްވުމަށެވެ.
މުންޑޫ ރައްޔިތުން ޕެޓިޝަން ހުށައެޅުމުން އެރަށުގެ ކައުންސިލުން ޕެޓިޝަން ހުށައެޅި މީހުންގެ މައުލޫމާތު ހޯދުމަށް އީސީއަށް އެދުނެވެ. ނަމަވެސް އީސީއިން އެރަށު ކައުންސިލަށް ދިން ޖަވާބުގައި ބުނެފައި ވަނީ އެއީ ސިއްރު ޕެޓިޝަނެއް ކަމަށާއި ޕެޓިޝަންގެ މައުލޫމާތު ދެވެން ނެތް ކަމަށެވެ. އީސީއިން ބުނީ ޕެޓިޝަން ހުށައެޅި ރައްޔިތުންގެ މައުލޫމާތު ދެވެން ނެތް ކަމަށް މުންޑޫ ކައުންސިލްގައި ބުނުމުން އެމީހުންނާއި މެދު ފިޔަވަޅު އަޅާނެ ކަމަށް އެ ކައުންސިލުން ބުނެފައި ވާކަމަށެވެ.
އަކްރަމް ވިދާޅުވީ ޕެޓިޝަން ހުށައެޅި ފަރާތްތަކުން ވެސް އެކަމިޝަނަށް ގުޅާ ޕެޓިޝަނަށް ސިއްރު ކުރުމަށް އެދިފައިވާ ކަމަށާއި ޕެޓިޝަން ހުށައެޅިކަމަށް ޝައްކު ކުރެވޭ މީހުންނަށް ކައުންސިލުން ބިރު ދައްކާ ކަމުގެ ޝަކުވާ އައިސްފައިވާ ކަމަށެވެ. އަދި އެކަމުގައި ތިންވަނަ ފަރާތެއްގެ މަސްލަހަތު އޮތުމުން ހާމަ ކުރެވެން ނެތް ކަމަށް ބުނެފައިވާނެ ކަމަށެވެ.
މި މައްސަލާގައި އީސީއިން ރައްޔިތުން މަޖިލީހުގެ ހިއުމަން ރައިޓްސް އެންޑް ޖެންޑާ ކޮމެޓީގެ ލަފައެއް ވެސް ހޯދިއެވެ. އެކޮމިޓީއިން ލަފާ ދީފައިވަނީ މުންޑޫ ކައުންސިލުން ހޯދަން އެދިފައިވަނީ ތިން ވަނަ ފަރާތެއްގެ މަސްލަހަތު ހިމެނޭ މައުލޫމާތުތަކެއް ކަމަށް ވާތީ މައުލޫމާތު ނުދިނުމަށެވެ.
މައުލޫމާތު ހޯދައި ލިބިގަތުމުގެ ގާނޫނުގައި ބުނެފައިވާ ގޮތުން ދައުލަތުގެ އިދާރާއަކުން ދޫކުރަން ޖެހޭ މައުލޫމާތަކީ، ތިންވަނަ މީހެއްގެ ޒާތީ މައުލޫމާތު ކަމުގައިވާނަމަ، އެ މައުލޫމާތެއް އެ ތިންވަނަ ފަރާތުގެ ރުހުމާއެކުގައި މެނުވީ ދައުލަތުގެ އެ އިދާރާއެއްގެ އިންފޮމޭޝަން އޮފިސަރު ދޫކޮށްގެންނުވާނެއެވެ.
