ކުރީގެ ނާއިބް ރައީސް އަހުމަދު އަދީބު ބޭސްފަރުވާ އަށް ރާއްޖެއިން ބޭރަށް ގެންދިޔުމަށް ފަހު އަނބުރާ ރާއްޖެގެނައުމުގެ މަސައްކަތް ކާމިޔާބު ކަމާއި އެކު ނިންމާލެވިފައިވާތީ ހޯމް މިނިސްޓަރު އިމްރާން ވަނީ ފުލުހުންނާއި ކަރެކްޝަންސް އަށް ޝުކުރު އަދާކޮށްފިއެވެ.
ބޭސްފަރުވާއަށް ފަހު އަދީބު ރާއްޖެވަޑައިގަތީ ހޮނިހިރު ދުވަހު މެންުދުރުއެވެ.
ހޯމް ޓީމް ހޭޝްޓެގް ޖައްސަވާފައި އިމްރާން ކުރެއްވި ޓްވީޓެއްގައި ވިދާޅުވީ، ގާނޫނު ތަކުގެ މަފްހޫމާއި އިންސާނިއްޔާތު ކަމަށް ރިޔާއަތް ކޮށް، އަދީބު ރާއްޖެއިން ބޭރަށް ބޭސްފަރުވާ އަށް ގެންދިޔުމަށް ފަހު އަނބުރާގެނެސް ތަންފީޒު ކުރަން ޖެހޭ ހުކުމް ތަންފީޒު ކުރާނެ ކަމަށް ރައްޔިތުންނަށް ޔަގީންކަން ދެއްވި ކަމަށެވެ. އެގޮތުން ވީވައުދު ފުއްދާފައިވާ ކަމަށް ވިދާޅުވިއެވެ.
ކާމިޔާބު ކޮށް އެ އޮޕަރޭޝަން ހިންގުނީ ފުލުހުންނާއި، ކަރެކްޝަނަލް ސަރވިސްގެ ލީޑަރޝިޕްއާ އޮޕަރޭޝަނަލް ސްޓާފުންގެ ބޮޑު ދައުރެއް އޮވެގެން ކަމަށް އިމްރާން ވިދާޅުވިއެވެ. އެކަން ކާމިޔާބު ކޮށް ނިންމާލެވިފައިވާތީ ޕޮލިސް ކޮމިޝަނަރު މުހައްމަދު ހަމީދުގެ އިތުރުން ކަމިޝަނަރ އޮފް ޕްރިޒަންސް އަބްދުﷲ މުނާޒު އަށް އިމްރާން ވަނީ ޝުކުރު އަދާކޮށްފައެވެ.
އަދީބުއާއެކު އިންޑިއާއަށް ދިޔަ ފުލުހުންގެ އޮފިސަރުންގެ މަސައްކަތަށް އެމްސީ ހަމީދު ވަނީ ތައުރީފް ކޮށްފައެވެ. އަދީބު އަރިހުގައި ކަރެކްޝަނަލް ސާވިސްގެ އޮފިސަރުންނާއި މޯލްޑިވްސް ޕޮލިސް ސާވިސްގެ އޮފިސަރުން ވެސް އިންޑިއާއަށް ދަތުރު ކޮށްފައިވެއެވެ.
