ޖުޑީޝަރީ އިސްލާހު ކުރުމަށް ހުށަހަޅާ ގާނޫނުތަކުގެ ތެރޭގައި ކޯލިޝަނަށް ބާރުދޭ ގާނޫނު ހިމެނޭނެ : ރައީސް ސޯލިހު
ގާނޫނެއްގެ ތެރެއިން ކޯލިޝަނަށް ބާރުވެރިކަން ދޭނެ ކަމަށް ރިޔާސީ އިންތިހާބުގެ ކެމްޕޭނުގެ ތެރޭގައި ރައީސް ވަނީ ވިދާޅުވެފައި
ކޯލިޝަން ޕާޓީތަކުގެ ލީޑަރުންގެ ބައްދަލުވުމެއް މި މަހު ތެރޭގައި ބާއްވާނެ ކަމަށް ރައީސް ވަނީ ވިދާޅުވެފައި
ޖުޑީޝަރީ އިސްލާހު ކުރުމަށް ހުށަހަޅާ 201 ގާނޫނުގެ ތެރޭގައި، ކޯލިޝަނަށް ބާރު ލިބޭ ގާނޫނު ހިމަނުއްވާނެ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސުލް ޖުމްހޫރިއްޔާ މިހެން ވިދާޅުވީ ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި "ރާއްޖެއެމްވީން" ކުރި ސުވާލަކަށް ޖަވާބު ދެއްވަމުންނެވެ.
ކޯލިޝަނަށް ގާނޫނީ ބާރުވެރިކަން ދޭނެ ކަމަށް ރިޔާސީ އިންތިޚާބުގެ ތެރޭގައި ރައީސުލްޖުމްހޫރިއްޔާ ވިދާޅުވެފައިވާތީ، އެ މަސައްކަތް މިހާރު އޮތީ ކިހާ ހިސާބަކުތޯ "ރާއްޖެއެމްވީން" ސުވާލު ދެންނެވުމުން ރައީސް ސޯލިހު ވިދާޅުވީ، އިސްލާހުކޮށް އަލަށް ތައާރަފް ކުރަންޖެހޭ ޖުޑީޝަލް ރިފޯރމް އާއި ގުޅޭ 201 ގާނޫނެއް އެބައޮތް ކަމަށާއި، އެ ގާނޫނުތަކުގެ ތެރޭގައި ކޯލިޝަނަށް ބާރުވެރިކަން ދޭ ގާނޫނު ހުށަހަޅުއްވާނެ ކަމަށެވެ. 201 ގާނޫނު ހުށަހަޅުއްވަން ނިންމާފައިވަނީ 5 އަހަރަށް ބަހާލައިގެން ކަމަށް ރައީސް ވަނީ ވިދާޅުވެފައެވެ.
ސަރުކާރު ހިންގާ ކޯލިޝަންގެ ޕާޓީތައް ސަރުކާރުގެ ކޯލިޝަނެއްގެ ގޮތުގައި ދެމިއޮންނާނެ ގޮތާއި ރޫޅޭނެ ގޮތް ބަޔާންކޮށް ގާނޫނެއްގެ ތެރެއިން އެ ކޯލިޝަނަށް ބާރުވެރިކަން ދޭނެ ކަމަށް ރިޔާސީ އިންތިހާބުގެ ކެމްޕޭނުގެ ތެރޭގައި ރައީސް ސޯލިހު ވަނީ ވިދާޅުވެފައެވެ. އެކަމަށް ޕާޓީތަކުން ވެސް ވަނީ އެއްބަސްވެފަ އެވެ.
މީގެ އިތުރުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރައްޔިތުންގެ މަޖިލީހުގެ ކެމްޕެއިން ތެރޭގައި ވިދާޅުވެފައިވަނީ، ރައްޔިތުންގެ މަޖިލީހުގެ މެޖޯރިޓީ އެމްޑީޕީއަށް ލިބިއްޖެ ނަމަ، ކޯލިޝަން ސަރުކާރަށް ގާނޫނީ ބާރުވެރިކަން ދޭން ރައްޔިތުންގެ މަޖިލީހުގެ ތެރެއިން މަސައްކަތް ކުރައްވާނެ ކަމަށެވެ. ރައްޔިތުންގެ މަޖިލީހުގެ އިންތިޚާބުގައި އެމްޑީޕީއަށް ވަނީ މަޖިލީހުގެ ސާފު އަޢުލަބިއްޔަތު، ލިބިފައެވެ.
ސަރުކާރު ކޯލިޝަންގައި ހިމެނެނީ ވެރިކަން ކުރާ މައި ޕާޓީ އެމްޑީޕީ އާއި، އަދާލަތު ޕާޓީ، މައުމޫން ރިފޯރމް މޫވްމެންޓް، އަދި ޖުމްހޫރީ ޕާޓީއެވެ.
އާ ގާނޫނު އަސާސީއަށް އަމަލުކުރަން ފެށި ހިސާބުން ބޭއްވި ކޮންމެ ރިޔާސީ އިންތިޚާބެއް ކާމިޔާބުވެފައިވަނީ ކޯލިޝަނަކާއި އެކުއެވެ. ނަމަވެސް ގާނޫނީ އިމުގެ ތެރެއިން ކޯލިޝަންއެއް ހިގާނެ ގޮތް ލިޔެވިފައި ނެތުމުގެ ސަބަބުން ވެރިކަމުގެ މެދުތެރެއިން، ކޯލިޝަން އަންނަނީ ރޫޅެމުންނެވެ.
