ބާރ ކައުންސިލް އިންތިޚާބަށް ކުރިމަތިލީ 23 ފަރާތަކުން
އިންތިހާބުގައި ވޯޓު ލުމުގެ ހައްގު ލިބިފައިވާ 1490 ގާނޫނީ ވަކީލުން އެބަތިބި
ވަކީޅުން ގާނޫނީ ވަކީލު ކަމުގެ ހުވާ ކުރައްވަނީ
މި ހިނގާ ޖުލައި މަހުގެ 13 ވަނަ ދުވަހު އޮންނަ ބާރ ކައުންސިލް އިންތިހާބަށް މިހާތަނަށް 23 ފަރާތަކުން ފޯމު ހުށައަޅާފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
ބާރ ކައުންސިލްގެ އިންތިޚާބަށް ފޯމު ހުށައެޅުމުގެ މުއްދަތު ހުކުރު ދުވަހުގެ ހަވީރު 5 ޖެހިއިރު ވަނީ ހަމަވެފައެވެ. މުއްދަތު ހަމަވިއިރު ރައީސް ކަމުގެ މަޤާމަށް 2 ފަރާތަކުން ކުރިމަތިލައްވާފައިވާއިރު، ނައިބް ރައީސް ކަމުގެ މަޤާމަށް 2 ބޭފުޅަކު ވަނީ ކުރިމަތިލައްވާފައެވެ. މެމްބަރު ކަމަށް 19 ބޭފުޅުން ވަނީ ކުރިމަތިލައްވާފައެވެ.
އިލެކްޝަންސް ކޮމިޝަނުގެ ނައިބް ރައީސް އަމްޖަދު މުސްތަފާ ވިދާޅުވީ ސުލްހަވެރިކަމާއެކު ދެފުށް ފެންނަ ގޮތަށް އިންތިހާބު ކުރިއަށް ގެންދިއުމަށް މަސައްކަތްތަކެއް ކުރަމުންދާ ކަމަށާއި، އިންތިހާބާ ގުޅޭ އުސޫލު އިލެކްޝަންސް ކޮމިޝަނުން ކަނޑައަޅައި އެ އުސޫލު ގެޒެޓް ވެސް ކޮށްފައިވާ ކަމަށެވެ.
އަމްޖަދު ވިދާޅުވީ އިންތިހާބުގައި ވޯޓު ލުމުގެ ހައްގު ލިބިފައިވަނީ 1490 ވަކީލުންނަށް ކަމަށާއި، ވޯޓު ލުމަށް ރީ ރެޖިސްޓްރޭޝަނަށް ހުޅުވާލުމުން މާލޭގެ އިތުރުން އައްޑޫ ސިޓީން 11 ފަރާތަކުން ރަޖިސްޓްރީ ވެފައިވާ ކަމަށެވެ. އެހެންކަމުން މާލެއާއި އައްޑޫ ސިޓީގައި ވޯޓު ފޮށި ބެހެއްޓުމަށް ކޮމިޝަނުން ނިންމަވާފައިވާ ކަމަށް އަމްޖަދު ވަނީ ވިދާޅުވެފައެވެ.
ބާރ ކައުންސިލުގެ ރައީސް ކަމުގެ މަޤާމަށް ކުރީގެ ބަންޑާރަނައިބް ހުސްނުއްސުއޫދާއި، ގާނޫނީ ވަކީލް މައުމޫނު ހަމީދު ކުރިމަތިލައްވާފައިވާއިރު، ނައިބް ރައީސް ކަމުގެ މަޤާމަށް ޤާނޫނީ ވަކީލު އަބްދުﷲ މުއިއްޒު އަދި ކުރީގެ ސިވިލް ކޯޓް ފަނޑިޔާރު މުހައްމަދު ހަލީމް ކުރިމަތިލައްވައިފައިވެއެވެ.
ގާނޫނީ ފަންނުގެ ބިލް ރައްޔިތުންގެ މަޖިލީހުން ފާސްކޮށް ރައީސުލް ޖުމްހޫރިއްޔާ ގެޒެޓްކުރެއްވުމާއެކު އެ ގާނޫނުގެ އެގާރަ ވަނަ މާއްދާގެ (ށ) ގައި ބުނާ ގޮތުން ބާރ ކައުންސިލުގެ އެގްޒެކެޓިވް ކޮމިޓީއަށް ރައީސާއި ނައިބް ރައީސްގެ އިތުރުން، ހަ ގާނޫނީ ވަކީލަކު އިންތިހާބު ކުރަންޖެހެއެވެ.
ގާނޫނުގައިވާ ގޮތުން ބާރ ކައުންސިލްގެ އެގްޒެކެޓިވް ކޮމިޓީއަށް އިންތިޚާބު ކުރެވޭ މަގާމްތައް ހޮވުމަށް ބާއްވާ ފުރަތަމަ އިންތިޚާބު ބާއްވަންޖެހޭނީ އިލެކްޝަންސް ކޮމިޝަނުން ކަނޑައަޅާ އުސޫލަކުންނެވެ. ގާނޫނަށް އަމަލުކުރަން ފަށާތާ 21 ދުވަހުގެ ތެރޭގައި، އިލެކްޝަންސް ކޮމިޝަނުން އިންތިޚާބު ބާއްވަން ޖެހެއެވެ.
އިންތިހާބު ކުރެވޭ މަގާމުތަކަށް ބޭފުޅުން ހޮއްވަވަނީ ގާނޫނީ ވަކީލުކަމުގެ ހުއްދަ ލިބިފައިވާ ފަރާތްތަކުގެ މެދުގައި ނެގޭ ވޯޓަކުންނެވެ.
