މިއަދުގެ ވަގުތެއްގައި އަދީބް ރާއްޖެއަށް ވަޑައިގަންނަވާނެ
6 ޖުލައި 2019 | ހޮނިހިރު 06:13ފުރަތަމަ ދިން މުއްދަތަށް ދިހަ ދުވަސް އިތުރުކޮށްދީފައިވޭ
ކުރީގެ ނައިބު ރައީސް އަހުމަދު އަދީބް އަނބިކަނބަލުންނާ އެކު އިންޑިއާއަށް ފުރާވަޑައިގެންނެވި ދުވަހުގެ ފޮޓޯއެއް
ބޭސްފަރުވާއަށް މިހާރު އިންޑިއާއަށް ވަޑައިގެން އުޅުއްވާ ކުރީގެ ނައިބު ރައީސް އަހުމަދު އަދީބު ހޮނިހިރު ދުވަހުގެ ވަގުތެއްގައި ރާއްޖެއަށް ވަޑައިގަންނަވާނެއެވެ.
ޖޫން މަހުގެ 14 ވަނަ ދުވަހު އިންޑިއާއަށް ފުރާވަޑައިގެންނެވި އަދީބަށް ފުރަތަމަ ދެވުނު ދިހަ ދުވަހުގެ މުއްދަތަށް، ކަރެކްޝަންސްއިން ދިހަ ދުވަސް އިތުރު ކޮށްދީފައިވެއެވެ. ދުވަސް އިތުރު ކޮށްދެއްވި ސަބަބު ބަޔާންކުރަމުން ކަރެކްޝަންސްއިން އޭރު ބުނެފައިވަނީ، އަދީބުގެ ބޭސްފަރުވާގެ މުއްދަތު އިތުރުކޮށްދިނީ ފުރަތަމަ ދެވުނު މުއްދަތުގެ ތެރޭގައި އަދީބުގެ ބޭސްފަރުވާގެ ކަންކަން ފުރިހަމަވެފައި ނުވާތީ ކަމަށެވެ.
އަދީބު އަރިހުގައި ކަރެކްޝަނަލް ސާވިސްގެ އޮފިސަރުންނާއި މޯލްޑިވްސް ޕޮލިސް ސާވިސްގެ އޮފިސަރުން ވެސް އިންޑިއާއަށް ދަތުރު ކޮށްފައިވެއެވެ. އަދީބަށް ފުރަން ހުއްދަ ދިނުމުން ސަރުކާރަށް ގިނަ ފާޑުކިޔުންތަކެއް އަމާޒުވެފައިވާ އިރު، އޭގެ ރައްދުގައި ހޯމް މިނިސްޓަރު ޝޭހް އިމްރާން އަބްދުﷲ ވިދާޅުވީ އަދީބަށް ފިއްލަވަން ފުރުސަތު ނުދެއްވާނެ ކަމަށާއި، ފިއްލަވައިފި ނަމަ އެކަމުގެ ފުރިހަމަ ޒިންމާ ނަންގަވާނެ ކަމަށެވެ.
އަދީބުގެ ދަތުރާ ބެހޭގޮތުން ރާއްޖެއެމްވީއަށް މައުލޫމާތު ދެމުން ކަރެކްޝަނަލް ސާވިސްއިން ބުނެފައިވަނީ ކުރިން ވެސް ރޭވިފައި އޮތް ގޮތަށް އަދީބު ހޮނިހިރު ދުވަހުގެ ވަގުތެއްގައި މާލެ ވަޑައިގަންނަވާނެ ކަމަށެވެ. ފުލުހުން ވެސް ބުނެފައިވަނީ އަދީބު މާލެއަށް ވަޑައިގަންނަވާނެ ކަމަށާއި، މާލެ އައިހާ އަވަހަކަށް އެ މައުލޫމާތު ފޯރުކޮށްދޭނެ ކަމަށެވެ.
ބޭސްފަރުވާއަށް ވަޑައިގެން އުޅުއްވަނިކޮށް، ސުޕްރީމް ކޯޓުން ވަނީ އަދީބުގެ ޕާސްޕޯޓް ހިފަހައްޓަން ވަގުތީ އަމުރެއް ވެސް ނެރެފައެވެ. ސުޕްރީމް ކޯޓުން އެ އަމުރު ނެރުނީ އެމްއެމްޕީއާރްސީގެ ހިޔާނާތުގެ މައްސަލައިގައި އިއްވި އަށް އަހަރު ދުވަހުގެ ޖަލު ހުކުމް ހައި ކޯޓުން ބާތިލް ކުރުމުން، ދައުލަތުން އިސްތިއުނާފުކުރަން ސުޕްރީމް ކޯޓަށް ހުށައެޅުމާއި ގުޅިގެންނެވެ.
