ޖޭއެސްސީގެ ގާނޫނަށް ހުށަހެޅުނު އިސްލާހު ފާސްކޮށް ކޮމިޓީ އަށް
ބިލް ފާސްކޮށްފައިވަނީ 68 މެމްބަރުންގެ ވޯޓާއެކު
މަޖިލިސް ޗެމްބަރުގައި މެމްބަރުން
ޖުޑީޝަލް ސާރވިސް ކޮމިޝަން (ޖޭއެސްސީ) ގާނޫނަށް އިސްލާހު ގެނައުމުގެ ބިލް މަޖިލީހުން ފާސްކޮށްފިއެވެ. ބިލް ފާސްކޮށްފައިވަނީ 68 މެމްބަރުންގެ ވޯޓާއި އެކުއެވެ. މި ބިލް ސަރުކާރުގެ ފަރާތުން މަޖިލީހަށް ހުށަހެޅުއްވީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީއެވެ. ބިލް ފާސްވުމުން އިތުރަށް ދިރާސާ ކުރުމަށް ވަނީ ޖުޑިޝަރީ ކޮމިޓީއަށް ފޮނުވާފައެވެ.
ޖޭއެސްސީގެ ގާނޫނަށް ގެންނަން ހުށަހަޅާފައިވާ އިސްލާހަކީ ޖޭއެސްސީގެ ގާނޫނުގެ 21 ވަނަ މާއްދާ އަށް ގެންނަން ހުށަހަޅާފައިވާ އިސްލާހެކެއެވެ. އިސްލާހުގައި ވަނީ "ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން އުފެއްދުން" އެ ނަމުގައި މާއްދާއެއް ޖޭއެސްސީގެ ގާނޫނުގެ 21 ވަނަ މާއްދާއަށް އިތުރު ކުރުމަށެވެ.
ޖޭއެސްސީގެ ގާނޫނަށް ހުށަހެޅުނު އިސްލާހު ގާނޫނަކަށްވާ ހިސާބުން "ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން" ގެ ނަމުގައި އިދާރާއެއް އުފެދޭނެ އެވެ. އެ އިދާރާ އުފެދުމާއެކު މިހާރު ހިންގަމުން އަންނަ ޑީޖޭއޭ އުވި، ޑީޖޭއޭގެ ހުރިހާ މަސައްކަތެއް އެ އިދާރާގެ ދަށަށް ބަަދަލުވެގެންދާނެއެވެ.
