އިންފޮމޭޝަން ކޮމިޝަނަރުގެ އޮފީހުން ބޭނުންވާ ޑޮކިޔުމަންޓަކީ ތިންވަނަ ފަރާތުގެ މަސްލަހަތު ހިމެނޭ އެއްޗެއް: އަކުރަމް
3 ޖުލައި 2019 | ބުދަ 04:27އެ ޑޮކިއުމަންޓަކީ ލ. މުންޑޫގެ ބައެއް ރައްޔިތުން ކުރިން ހުށަހެޅި ޕެޓިޝަނެއް
އިލެކްޝަންސް ކޮމިޝަންގެ މެމްބަރު އަދި ސްޕޯކްސް ޕާރސަން އަހްމަދު އަކްރަމް
އިންފޮމޭޝަން ކޮމިޝަނަރުގެ އޮފީހަށް ބޭނުންވާ ބައެއް ޑޮކިއުމަންޓްތަކުގެ މައްސަލާގައި އިލެކްޝަންސް ކޮމިޝަނާއި ހިޔާލު ތަފާތުވެފައިވާ ކަމަށް އިލެކްޝަންސް ކޮމިޝަންގެ މެމްބަރު އަދި ސްޕޯކްސް ޕާރސަން އަހްމަދު އަކްރަމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އަންގާރަ ދުވަހުގެ ރޭ ވާހަކަ ދައްކަވަމުން އަކްރަމް ވިދާޅުވީ އިންފޮމޭޝަން ކޮމިޝަނާއި ހިޔާލު ތަފާތުވެފައިވަނީ ނިމިފައި އޮތް ކަމެއްގެ މައުލޫމާތު ތަކުރާރުކޮށް އެ ކޮމިޝަނުން ހޯދަން މަސައްކަތް ކުރާތީ ކަމަށާއި އެ މައުލޫމާތުތަކަކީ ތިންވަނަ ފަރާތެއްގެ މަސްލަހަތު ހިމެނޭ، އާންމުކޮށްފިނަމަ އެ ބައެއްގެ މަސްލަހަތުގެ ގެއްލި އިންސާނީ ކަރާމާތަށް އުނިކަމެއް އަންނާނެ ކަމެއް ކަމަށް އީސީ އަށް ފާހަގަކުރެވޭ ކަމަށެވެ.
އަކްރަމް ވިދާޅުވީ ލ. މުންޑޫ ކައުންސިލް އިން ގަމު ދާއިރާ އިން ވަކިވެ އިސްދޫ ދާއިރާއަށް ބަދަލުވާން އިލެކްޝަން ކޮމިޝަންގައި އެދުނު ކަމަށާއި އެ ވާހަކަ މީޑިއާއަށް ތިލަވެގެން ދިޔުމުން މުންޑޫގެ ބައެއް ރައްޔިތުން އެކަމާއި ދެކޮޅަށް ޕެޓިޝަނެއް ހުށަހެޅި ކަމަށެވެ. އެއަށް ފަހު މުންޑޫ ކައުންސިލުން އަނެއްކާ ވެސް ޕެޓިޝަން ހުށަހެޅި މައްސަލާގައި އެމީހުންނާއި ދޭތެރޭ ފިޔަވަޅު އަޅަން ބޭނުންވާ ކަމަށް ބުނެ އީސީއެއް ސިޓީއެއް ފޮނުވި ކަމަށާއި އެހެން ނަމަވެސް އެއީ އެ ކައުންސިލާއި ހިއްސާކުރެވޭނެ މައުލޫމާތެއް ނޫން ކަމަށް އީސީ އިން ނިންމާފައިވާ ކަމަށް އަކްރަމް ވިދާޅުވިއެވެ.
ކައުންސިލްގެ ސިޓީ ލިބުނު ދުވަސް ނޫން އޭގެ އަނެއް ދުވަހު އިންފޮމޭޝަން ކޮމިޝަނަރުގެ އޮފީހުން އެ ޕެޓިޝަން ހުށަހެޅި ފަރާތްތަކުގެ މައުލޫމާތު ހިއްސާ ކުރުމަށް އެދުނުކަން ފާހަގަކުރައްވާ އަކްރަމް ވިދާޅުވީ އެ މައުލޫމާތު ހިއްސާ ނުކުރެވޭނެ ކަމަށް ދެންނެވުމުން، އެ މައުލޫމާތު ހިއްސާ ނުކޮށްފިނަމަ އޯޕަން ހިއަރިންގްއަކަށް ދާން ޖެހިދާނެ ކަމަށް ބުނެ އީސީ އަށް އިންޒާރު ދީފައިވާ ކަމަށެވެ.
ޕްރޮގްރާމްގައި ވާހަކަ ދައްކަވަމުން އަކްރަމް ވިދާޅުވީ މުންޑޫ ކައުންސިލުން ޕެޓިޝަން ހުށަހެޅުމުގެ މާ ކުރިން ވެސް މާލެ ފިޔަވާ އެހެން އެއްވެސް ދާއިރާއަކަށް ބަދަލު ނުގެނައުމަށް އިލެކްޝަނުން ނިންމާފައިވާ ކަމަށެވެ.
