ވާދޫގައި ގެސްޓް ހައުސް ތަރައްގީ ކުރުމަށް ބިން ކުއްޔަށް ދިނުމަށް ނިންމައިފި
އަވަސް މުއްދަތެއްގައި މި ބިންތައް ބީލަމުގެ އުސޫލުން ދޫކުރުމަށް ވަނީ ނިންމާފައި
ގދ. ވާދޫ - 5000 (ފަސް ހާސް) އަކަފޫޓްގެ 16 ޕްލޮޓް ދޫކުރުމަށް ނިންމާފައިވޭ
ގދ. ވާދޫގައި ލޯކަލް ޓުއަރިޒަމް ތަރައްގީ ކުރުމަށް އެރަށުން ބިން ކުއްޔަށް ދިނުމަށް ސަރުކާރުން ނިންމައިފިއެވެ.
ހޯމަ ދުވަހު ޓުއަރިޒަމް މިނިސްޓްރީން ނެރުނު ބަޔާނެއްގައި ވަނީ ޓުއަރިޒަމާއި ބެހޭ ޤާނޫނު ނަމްބަރު 99/2 ގެ ހަތަރުވަނަ މާއްދާގެ ދަށުން 5000 (ފަސް ހާސް) އަކަފޫޓްގެ 16 ޕްލޮޓް ވާދޫގައި ގެސްޓްހައުސް ތަރައްގީ ކުރާ ބިމުގެ ގޮތުގައި ރައީސުލް ޖުމްހޫރިއްޔާ އިބްރާހިމް މުހައްމަދު ސާލިޙު ކަނޑައޅުއްވާފައިވާ ކަމަށެވެ. އަދި އަވަސް މުއްދަތެއްގައި މި ބިންތައް ބީލަމުގެ އުސޫލުން ދޫކުރުމުގެ ކަންތައް ވާދޫ ކައުންސިލާއި އެހެނިހެން ކަމާއި ބެހޭ އިދާރާ ތަކާއި ގުޅިގެން ކުރިއަށް ގެންދާނެ ކަމަށް ބަޔާނުގައި ވެއެވެ.
ރާއްޖޭގައި ލޯކަލް ޓުއަރިޒަމް ތަރައްގީ ކުރުމަކީ މިސަރުކާރުގެ ވައުދުތަކުގެ ތެރޭގައި ހިމެނޭ އެއް ވައުދެވެ. އަދި ލޯކަަލް ޓޫރިޒަމް ކުރިއަރުވައި، ޕްރޮމޯޓްކުރުމަށް އަންނަނީ ގިނަ މަސައްކަތްތަކެއް ސަރުކާރުން ކުރަމުންނެވެ.
ސަރުކާރުގެ އަމާޒަކީ ލޯކަލް ޓޫރިޒަމް ދަށް ސަރަހައްދުތަކަށް އެ ސިނާއަތް ފުޅާކުރުުމެވެ. އެގޮތުން ރާއްޖޭގެ އުތުރާއި، ދެކުނަށް ޓޫރިޒަމް ފުޅާކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.
