އެމްޑީޕީގެ ޕާލިމެންޓްރީ ގްރޫޕުގެ ލީޑަރަކަށް މެދު ހެންވޭރު ދާއިރާގެ މެންބަރު އަލީ އާޒިމް ހޮވިވަޑައިގެންފި އެވެ.

އެމްޑީޕީގެ ޕާލިމެންޓަރީ ގުރޫޕްގެ އިންތިހާބުގައި ޕާލިމެންޓްރީ ގްރޫޕުގެ ލީޑަރަކަށް ހަމައެކަނި ކުރިމަތިލައްވާފައިވާ ވަނީވެސް އާޒިމް އެކަނިއެވެ. އޭނާއަށް ވޯޓުގައި ބައިވެރިވެވަޑައިގެންނެވި ހުރިހާ މެމްބަރުންގެ ވޯޓު ލިބިވަޑައިގެންފައިވެއެވެ. އެއީ 57 ވޯޓެވެ.

އާޒިމް އަކީ 18 ވަނަ މަޖިލީހުގައި ވެސް މެދު ހެންވޭރު ދާއިރާގެ މެމްބަރުކަން ކުރައްވާފައިވާ ބޭފުޅެކެވެ. އަދި އޭރުގައި އެމްޑީޕީގެ ޕީޖީ ނައިބް ލީޑަރުކަންވެސް އާޒިމް ކުރެއްވި އެވެ.

18 ވަނަ މަޖިލީހުގައި އެމްޑީޕީ ޕީޖީ ލީޑަރަކުން އެންމެފަހުން ކުރައްވާފައިވަނީ ހިތަދޫ އުތުރު ދާއިރާގެ މެމްބަރު އަހުމަދު އަސްލަމް އެވެ. އޭގެކުރިން އެމްޑީޕީގެ ޕީޖީ ލީޑަރުކަން ކުރެއްވީ އޭރުގެ ހިންނަވަރު ދާއިރާގެ މެމްބަރު އަދި މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް އެވެ.

އޭގެއިތުރުން ނައިބް ލީޑަރުންނަށް ހޮވިވަޑައިގެންނެވީ ހުޅުދޫ ދާއިރާގެ މެމްބަރު އިލްޔާސް ލަބީބާއި، ހެންވޭރު ދެކުނު ދާއިރާގެ ހުސައިން ޝަހީމް އެވެ. އިލިޔާސް ލަބީބަށް ލިބިވަޑައިގެންނެވީ 57 ވޯޓު އަދި ހުސެއިން ޝަހީމަށް ލިބިވަޑައިގެންނެވީ 54 ވޯޓެވެ. ހުސެއިން ޝަހީމާއި ދެކޮޅަށް 3 ވޯޓު ދީފައިވެއެވެ.

ނައިބް ލީޑަރުގެ މަޤާމަށް ކުރިމަތިލެއްވީވެސް އެ ދެބޭފުޅުން އެކަންޏެވެ.

އެމްޑީޕީގެ ޕީޖީ އިންތިހާބުގައި އަމީންއާންމުގެ މަގާމަށް ހޮވި ވަޑައިގެންފައިވަނީ އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން (ބިގޭ) އެވެ. އަމީންއާންމުގެ މަޤާމަށް ކުރިމަތިލެއްވީވެސް މެމްބަރު މުހައްމަދު ރަޝީދު ހުސެއިން އެކަނި އެވެ. އޭނާއަށް ލިބިވަޑައިގެންނެވީ 57 ވޯޓެވެ.

އަމީންއާންމުގެ ނައިބަކަށް ހޮވިވަޑައިގެންފައިވަނީ 57 ވޯޓު ލިބިވަޑައިގެން ފުވައްމުލަކު މެދު ދާއިރާގެ މެންބަރު ހުސައިން މުހައްމަދު ދީދީ އެވެ.

ޗީފް ވިޕް އަކަށް ހޮވި ވަޑައިގެންފައިވަނީ އައްޑޫ މީދޫ ދާއިރާގެ މެންބަރު ރޮޒައިނާ އާދަމް އެވެ.

ރޮޒައިނާއަށް ލިބިވަޑައިގެންފައިވަނީ 50 ވޯޓެވެ.

ވިޕުންނަށް ހޮވިވަޑައިގެންފައި ވަނީ ފޮނަދޫ ދާއިރާގެ މެންބަރު މޫސާ ސިރާޖް، މައްޗަންގޮޅި ދެކުނު ދާއިރާގެ މެންބަރު އަހުމަދު ހައިތަމް، ފެދޫ ދާއިރާގެ މެންބަރު މުހައްމަދު ނިހާދު، ހެންވޭރު އުތުރުދާއިރާގެ މެންބަރު އިބްރާހިމް މުއިއްޒު، ކުޅުދުއްފުށީ އުތުރުދާއިރާގެ މެންބަރު ޔާސިރު އަބްދުލް ލަތީފް އަދި ތިނަދޫ އުތުރު ދާއިރާގެ މެންބަރު އަބްދުލް މުޣުނީ އެވެ.