ކާށިދޫގައި އަލަށް އިމާރަތް ކުރާ ސުކޫލު އިމާރާތާއި މަލްޓި ޕާރޕޯސް ހޯލުގެ މަސައްކަތް ބަޔަކާ ހަވާލުކޮށްފި
މިއީ 2019 ވަނަ އަހަރު މިނިސްޓްރީން ޕީއެސްއައިޕީގެ ދަށުން ކުރިއަށްގެންދާ ފުރަތަމަ މަޝްރޫއު
ކާށިދޫގައި އަލަށް އިމާރަތް ކުރާ ސުކޫލު ޕްރޮޖެކްޓް ބަޔަކާ ހަވާލުކުރުން
ކ އަތޮޅު ކާށިދޫގައި އަލަށް އިމާރާތް ކުރާ ސުކޫލު އިމާރާތާއި މަލްޓި ޕާރޕޯސް ހޯލުގެ މަސައްކަތް ބަޔަކާ ހަވާލު ކޮށްފިއެވެ.
ހޯމަ ދުވަހު މިނިސްޓްރީ އޮފް އެޑިއުކޭޝަންގައި ބޭއްވި ރަސްމިއްޔާތެއްގައި މިނިސްޓްރީގެ ފަރާތުން މި ޕްރޮޖެކްޓުގައި ސޮއި ކުރެއްވީ އެޑިއުކޭޝަން މިނިސްޓަރ ޑރ.އައިޝަތު އަލީއެވެ.
ސޯޅަ ކްލާސް ރޫމުގެ ހަތަރު ބުރީގެ އިމާރާތަކާއި މަލްޓި ޕާރޕޯސް ހޯލްއެއް މި ސުކޫލުގައި ހިމެނޭއިރު، މިއީ 2019 ވަނަ އަހަރު މިނިސްޓްރީ އޮފް އެޑިއުކޭޝަނުން ޕީއެސްއައިޕީގެ ދަށުން ކުރިއަށް ގެންދާ ފުރަތަމަ މަޝްރޫއު ކަމަށް މިނިސްޓަރ ވިދާޅުވިއެވެ.
އޭގެ އިތުރުން، ނުކުޅެދުންތެރިކަން ހުންނަ ފަރާތްތަކަށް ވަކިން އެކްސެސިބަލް ފާޚާނާއަކާއި، 8 ސްޓޯރ ރޫމް އަދި ނުކުޅެދުންތެރިކަން ހުުންނަ ފަރާތްތަކަށް ވެސް ފަސޭހަވާނެހެން ރޭމްޕެއް ހިމެނޭނެ ކަމަށް މިނިސްޓަރ ވިދާޅުވިއެވެ.
އެގޮތުން މި މަސައްކަތް ހަވާލު ކުރެވިފައިވަނީ ޑަބްލިއު އެންޑް އޭ އޯވަރސީސް ޕްރައިވެޓް ލިމިޓެޑްއާއެވެ.
މި ޕްރޮޖެކްޓުގެ ޖުމުލަ އަގަކީ 35،087،814.58 (ތިރީސް ފަސް މިލިއަން އައްޑިހަ ހަތް ހާސް އައްސަތޭކަ ސާދަ ރުުފިޔާ) ރުފިޔާ ކަމަށާއި، މި މަޝްރޫއު ނިންމުމަށް 1 އަހަރުގެ މުއްދަތެއް ކޮންޓްރެކްޓަރަށް ދެވިފައިވާ ކަމަށްވެސް މިނިސްޓަރ ވިދާޅުވިއެވެ.
2019 ވަނަ އަހަރުގެ ޕީއެސްއައިޕީ ޕްރޮޖެކްޓު ތަކަށް ބަލާއިރު، މިނިސްޓްރީއަށް 246،374،075 (ދުއިސައްތަ ސާޅީސް ހަ މިލިއަަން ތިން ލައްކަ ހަތްދިހަ ހަތަރުހާސް ހަތްދިހަ ފަސް ރުފިޔާ) ރުފިޔާ ލިބިފައިވާ ކަމަށާއި، ޖުމުލަ 20 ޕްރޮޖެކްޓެއް އިއުލާނުކޮށް އެވާރޑް ކުރުން ކުރިއަށް އޮތް 2 މަސް ތެރޭގައި ކުރިއަށްދާނެ ކަމަށް މިނިސްޓަރ ވިދާޅުވިއެވެ.
