"ޓްވިޓްސާފު ދި އައްޑޫ އެޑިޝަން" ގެ ނަމުގައި އައްޑޫގައި ކުރިޔަށްގެންދިޔަ ސާފުކުރުމުގެ ހަރަކާތުގައި 3 ގަޑި އިރި ތެރޭ 3 ޓަނުގެ ކުނި އެއްކޮށްފިއެވެ.
ހޮނިހިރު ދުވަހު އައްޑޫގައި މި ހަރަކާތް ހިންގާފައި ވަނީ ހިތަދޫ، ހުޅުމީދޫގެ އިތުރުން މަރަދޫ ފޭދޫގައެވެ. މި ހަރަކާތުގައި މިނިސްޓަރ މަހުލޫފުގެ އިތުރުން އައްޑޫ ސިޓީގެ މޭޔަރ އަބްދުﷲ ސާދިގް، މަޝްހޫރު ލަވަ ކިޔުންތެރިޔާ މޫޝަން، ދުވުންތެރިޔާ އާތިފް، އެމްއެންޑީއެފް ސަދަން އޭރިއާ، އައްޑޫ ޕޮލިސް ބައިވެރިވެފައިވެއެވެ. އަދި ހަރަކާތުގެ މެއިން ސްޕޮންސަރުން ކަމަށްވާ އުރީދޫ، ތިންކް މީޑިޔާ، ވެލިގާ ހާޑްވެއަރ އަދި މޯލްޑިވިއަންގެ އިތުރުން އައްޑޫ މީދޫ ކޯޕަރޭޓް ހިމެނޭ ގޮތުން 600 އަށް ވުރެ ގިނަ މީހުންނާއި، ކުދިން ވަނީ ބައިވެރިވެފައެވެ.
ހަރަކާތް ކުރިއަށްގެންގޮސްފައިވަނީ މެންދުރުފަހު ތިނަކުން ހަވީރު ހައެއް ޖަހަންދެނެވެ. ހަރަކާތް ކުރިއަށްގެންދިޔަ އިރު، ބޯކޮށްވާރެ ވެހުނު ނަމަވެސް، ހަރަކާތް ފޯރިޔާއެކު ކުރިއަށްގެންދިޔަ އެވެ.
މި ހަރަކާތުގެ ފައުޑަރ ނާ ސޯލިހު ރާއްޖެޓީވީއަށް މައުލޫމާތު ދެމުން ބުނީ އައްޑޫސިޓީގައި ކުރިޔަށްދިޔަ މި ހަރަކާތުގައި ހުޅުމީދޫން 611 ކިލޯގެ ކުނި އެއްކުރެވިފައިވާ އިރު މަރަދޫފޭދޫގެ އިތުރުން ހިތަދޫއިން ވަނީ ކޮންމެ ރަށަކުން ގާތްގަނޑަކަށް 1.19 ޓަނުގެ ކުނި އެއްކުރެވިފައި ކަމަށެވެ. އަދި މި ހަރަކާތުގެ މައިގަނޑު މަގުސަދަކީ ހަމައެކަނި ސާފުކުރުންނޫން ކަމަށާއި ކުނި އެޅުން ހުއްޓުވުމަށް އާންމުންގެ މެދުގައި ހޭލުންތެރިކަން އިތުރުކުރުން ކަމަށްވެސް ނާ ބުންޏެވެ.
ޕްލާސްޓިކް މަދުކުރުމަށް ކުރިޔަށްގެންދާ ހަރަކާތުގައި ދެން ކުރިއަށް އޮންނާނީ ޔޫތު މިނިސްޓްރީ އާ ގުޅިގެން މުޅި ރާއްޖެ އެއްކޮޅުން އަނެއްކޮޅަށް ސާފުކުރުންކަމަށް ޓްވިޓްސާފް ގެ ފައުންޑރ ނާ މައުލޫމާތު ދިނެވެ.
ޓްވިޓްސާފު އަކީ ނާ ސޯލިހު ކުރި ޓްވީޓެއްގެ ސަބަބުން ފެށުނު ހަރަކާތެކެވެ. މި ހަރަކާތް އެންމެ ފުރަތަމަ ކުރިޔަށް ދިޔައީ ޖޫން 14 ގައި ހުޅުމާލޭ ބީޗްގައެވެ.
