ރައީސުލްޖުމްހޫރިޔާ އިބްރާހީމް މުޙައްމަދު ސޯލިހާއި، އެމަނިކުފާނުގެ އަނބިކަނބަލުން ފަޒްނާ އަޙްމަދު، ސިންގަޕޫރަށް ކުރައްވާ ފުރަމާނަ ދަތުރުފުޅެއްގައި މިރޭ އެޤައުމަށް ވަޑައިގެންފިއެވެ.

ރައީސް ސޯލިހުގެ ދެކަނބަލުން ސިންގަޕޫރުގެ ޗަންގީ އެއާޕޯޓަށް މަރުޙަބާ ދެންނެވީ، ސިންގަޕޫރުގެ ސީނިއަރ މިނިސްޓަރ އޮފް ސްޓޭޓް ފޯ ޑިފެންސް މާލިކީ އޮސްމާން އެވެ.

ރައީސްގެ މި ދަތުރުފުޅުގައި ސިންގަޕޫރުގެ ރައީސާ ޙަލީމާ ޔަޢުޤޫބާއި ބޮޑުވަޒީރު ލީ ސިއެން ލޫންގ އާ ބައްދަލު ކުރައްވާނެއެވެ.

އަދި އޭގެ އިތުރުުން ސިންގަޕޫރުގައި ދިރިއުޅޭ ދިވެހިންނާއި ބައްދަލުކުރައްވައި އެމީހުންގެ ހާލު ބައްލަވައިލެއްވުމަށް ވެސް ހަމަޖެހިފައިވާ ކަމަށް ރައީސް އޮފީހުން ބުންޏެވެ.

ސިންގަޕޫރުގެ ކުނި މެނޭޖްކުރުމަށް ބޭނުންކުރާ ސަރަހައްދެއް ކަމުގައިވާ ސިމާކޯ ލޭންޑްފިލް އަށާއި ސިންގަޕޫރުގެ އައިއެސްޑީ ކައުންޓަރ ޓެރަރިޒަމް ސެންޓަރަށް ރައީސް ސޯލިހު ޒިޔާރަތްކުރެއްވުމަށް ވަނީ ހަމަޖެހިފައެވެ.