ފާޑުކިޔުންތައް އަމާޒުވެފައި ވަނިކޮށް، މާނިއު ނަން އަނބުރާ ގެންގޮސްފި
29 ޖޫން 2019 | ހޮނިހިރު 11:12ސަބަބެއް ހާމައެއް ނުކުރޭ
މާނިއު އެންއައިސީގެ ވަޒީފާއިން ވަކިކޮށްފައިވަނީ 2017 ވަނަ އަހަރު
އާއްމުންގެ ފާޑު ކިޔުންތައް އަމާޒުވެފައި ވަނިކޮށް ނެޝަނަލް އިންޓަގްރިޓީ ކޮމިޝަން (އެންއައިސީ)ގެ މެމްބަރަކަށް ކުރިމަތިލާފައިވާ އެ ކޮމިޝަންގެ ކުރީގެ ރައީސް ޔޫސުފް މާނިއު މުހައްމަދު އޭނާގެ ނަން އަނބުރާ ގެންގޮސްފިއެވެ.
މާނިއުގެ ނަން އަނބުރާ ގެންގޮސްދިނުމަށް އޭނާ ރައީސް އޮފީހަށް ލިޔުނު ސިޓީ ވަނީ ރާއްޖެ.އެމްވީ އަށް ލިބިފައެވެ. އޭނާގެ ނަން އަނބުރާ ނަގައިދިނުމަށް ސިޓީގައި އެދިފައިވެއެވެ. ނަން ނެގި ސަބަބެއް އޭނާއެއް ނުބުނެއެވެ.
އެންއައިސީގެ މެމްބަރު ކަމަށް ހުށަހެޅުމުގެ ފުރުސަތު ހުޅުވާލުމުން މާނިއު ކުރިމަތިލައްވައި ކޮމިޓީ މަރުހަލާއިން 75 ޕަސެންޓަށް ވުރެ މަތިން އޭނާއަށް ވަނީ މާކްސް ލިބިފައެވެ.
މާނިއުއަށް ފާޑު ކިޔުންތައް އެންމެ ބޮޑަށް އަމާޒުވެފައި ވަނީ ގެއްލުވާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާނުގެ އާއިލާއިންނެވެ. ރިލްވާނުގެ އާއިލާއިން ގަބޫލުކުރާ ގޮތުން މާނިއު އެންއައިސީގެ މަގާމުގައި ހުރިއިރު އޭނާ ވަނީ ރިލުވާނުގެ މައްސަލަ ބަލަން އިހުމާލުވެފައެވެ.
ރިލްވާނުގެ ގެއްލުވާލުމުގައި ތުހުމަތު ކުރެވޭ ސ. ހުޅުދޫ އަތިރީއާގޭ މުޙައްމަދު ސުއައިދުއާ މާނިއުއާ އާއިލީ ގޮތުން ގުޅިފައިވާ ފަރާތަކަށްވުމުން އަލުން މާނިއު އެ މަގާމަށް އައްޔަން ކޮށްފިނަމަ މައްސަލަ އިންސާފުވެރިކޮށް ނިމިދާނެ ކަމަށް ރިލްވާނުގެ އާއިލާއިން ނުދެކޭއެވެ. ކުރިން އެންއައިސީގެ ރައީސް ކަމުގައި ހުރި މާނިއު އެ މަގާމުން ވަކިކޮށްފައިވަނީ 2017 ވަނަ އަހަރުއެވެ.
ކޮމިޝަނެއް އެކުލަވާލައި، ރިޟްވާން ގެއްލުވާލުމުގެ މައްސަލަ ފުރިހަމައަށް ތަޙްޤީޤުކޮށް ފިޔަވަޅު އަޅާނޭކަމަށް ވަޢުދުވެފައިވަނިކޮށް، މާނިއު ނެޝަނަލް އިންޓަރގްރިޓީ ކޮމިޝަނަށް ޢައްޔަންކޮށްފިނަމަ، އެމުޢައްސަސާގެ މުސްތަޤިއްލުކަމާއި ނަޒާހަތްތެރިކަމާއިމެދު ރިލްވާނުގެ އާއިލާއިން ވަނީ ސުވާލު އުފައްދާފައެވެ.
އެ ހުރިހާ ތުހުމަތުތަކަށް ރައްދު ދެއްވަމުން މާނިއު ވިދާޅުވެފައިވަނީ، އޭނާ އެންއައިސީގެ ރައީސްކަމުގެ މަގާމާއި ހަވާލުވިއިރު ރިލްވާންގެ މައްސަލަ އަކީ ފުލުހުން ތަހުގީގު ކުރަމުންދާ މައްސަލައެއް ކަމަށެވެ. އަދި ފުލުހުން ތަހުގީގު ކުރަމުންދާތީ އެ މައްސަލަ އެންއައީސީން ބެލުމަށް ޤާނޫނީ އެއްވެސް ހައިސިއްޔަތެއް ނެތް ކަމަށެވެ.
އެންއައިސީގެ ރައީސްގެ ހައިސިއްޔަތުން އެ މައްސަލައިގައި އެކަމާއި ގުޅޭ މައުލޫމާތު ހޯދާ ތަހުގީގު ކުރުމަށް މަސައްކަތް ކުރެއްވި ކަމަށާއި އެހެންކަމުން އެމައްސަލައިގައި އެންއައސީން އިހުމާލް ވެއްޖެކަމަށް ބުނެވެން ނެތް ކަމަށް މާނިއު ވިދާޅުވިއެވެ. އަދި އޭނާ މަޤާމުން ވަކިކޮށްފައިވަނީ އެމައްސަލައިގައި ފިޔަވަޅު އަޅުއްވަން ތައްޔާރުވެފައި ވަނިކޮށް ކަމަށް މާނިއު މީޑިއާތަކަށް ފޮނުވާފައިވާ ބަޔާނެއްގައިވެއެވެ.
