ފުރަތަމަ ތިން މަހު އެންމެ ގިނައީ ނާޖާއިޒު ފައިދާ ހޯދައިދިނުމުގެ މައްސަލަތައް: އޭސީސީ
29 ޖޫން 2019 | ހޮނިހިރު 07:04ފުރަތަމަ ތިން މަސް ދުވަހުގެ ތެރޭގައި ނާޖާއިޒު ފައިދާ ހޯދައިދިނުމުގެ 65 މައްސަލަ އޭސީސީން ބަލާ ނިންމާފައިވޭ
އެންޓި ކޮރަޕްޝަން ކޮމިޝަންގެ އިދާރާ
އެންޓި ކޮރަޕްޝަން ކޮމިޝަން (އޭސީސީ) އިން މި އަހަރުގެ ފުރަތަމަ ތިން މަސް ދުވަހު އެންމެ ގިނަ އަދަދަކަށް ބަލާ ނިންމާފައިވަނީ ނާޖާއިޒު ފައިދާ ހޯދައިދިނުމުގެ ތުހުމަތުކުރެވޭ މައްސަލަތައް ކަމަށް އެ ކޮމިޝަނުން ބުނެފިއެވެ.
އޭސީސީ އިން މިހެން ބުނެފައިވަނީ، ބުދަ ދުވަހު ނެރުނު ބަޔާނެއްގައެވެ. އެގޮތުން، މި އަހަރުގެ ފުރަތަމަ ތިން މަސް ދުވަހުގެ ތެރޭގައި ނާޖާއިޒު ފައިދާ ހޯދައިދިނުމުގެ 65 މައްސަލަ އޭސީސީން ބަލާ ނިންމާފައިވާނެ ކަމަށް އެ ކޮމިޝަނުން ނެރެފައިވާ ބަޔާނުގައި ބުނެފައިވެއެވެ.
މީގެ އިތުރުން، ނާޖާއިޒު ފައިދާ ހޯދުމުގެ 26 މައްސަލައެއް، އޭސީސީން ބަލާ ނިންމާފައިވާނެ ކަމަށް ވެސް އެ ކޮމިޝަނުން ނެރުނު ބަޔާނުގައި ހާމަކޮށްފައިވެއެވެ.
އެ ބަޔާނުގައި އިތުރަށް ބުނެފައިވާ ގޮތުން، ދައުލަތަށް ފައިދާވާން އޮތްކަމެއްގައި އެނޫން ގޮތަކަށް ޢަމަލު ކޮށްފައިވާކަމުގެ ތުހުމަތުކުރެވޭ ތިން މައްސަލައެއް ވެސް އޭސީސީން ވަނީ ބަލާފައެވެ.
ވޭތުވެދިޔަ އަހަރުގެ މި މުއްދަތުގެ ތެރޭގައި ނާޖާއިޒު ފައިދާ ހޯދައިދިނުމުގެ ތުހުމަތުކުރެވޭ 160 މައްސަލައެއް އޭސީސީން ބަލާފައިވެއެވެ.
