ސިންގަޕޫރްގެ ރައީސާ ހަލީމާ ޔައުގޫބްގެ ދައުވަތަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހޮނިހިރު ދުވަހު ސިންގަޕޫރަށް ފުރާވަޑައިގަންނަވާ ގޮތަށް ހަމަޖެހިއްޖެއެވެ.
ރައީސް ސޯލިހު ސިންގަޕޫރަށް ކުރައްވާ ރަސްމީ ދަތުރުފުޅާއި ގުޅޭގޮތުން ރާއްޖެ.އެމްވީ އަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވީ، ރައީސް ސޯލިހު ސިންގަޕޫރަށް ފުރާވަޑައިގަންނަވާނީ މާދަމާ މެންދުރުފަހު 13:30 ގައި ކަމަށެވެ.
ރަސްމީ އިއްޒަތުގައި ރައީސްގެ ދެކަނބަލުންނަށް މަރުހަބާ ދެންނެވުން އޮންނާނީ ސިންގަޕޫރްގެ ރައީސާގެ ރަސްމީގެކޮޅު އިސްތާނާގައެވެ.
ރައީސާ ހަލީމާގެ އިތުރުން ސިންގަޕޫރްގެ ބޮޑުވަޒީރު ލީ ޝިއެންގް ލުންއާ ރައީސް ސޯލިހު ބައްދަލުކުރައްވަން ހަމަޖެހިފައިވާ ކަމަށް ހޫދު ވިދާޅުވިއެވެ. ސިންގަޕޫރަށް ކުރައްވާ ރަސްމީ ދަތުރުފުޅު ނިންމަވާލެއްވުމަށް ފަހު ރައީސް މާލެ ވަޑައިގަންނަވަން ހަމަޖެހިފައިވަނީ އަންގާރަ ދުވަހުގެރޭއެވެ.
ވެރިކަމާއި ހަވާލުވެވަޑައިގަތް ފަހުން ރައީސް ސޯލިހު ވަނީ މީގެ ކުރިން ނުރަސްމީ ދަތުރުފުޅެއް ސިންގަޕޫރަށް ކުރައްވާފައެވެ.
