ދިވެހި ރާއްޖޭގެ ގައުމީ ޔުނިވަރސިޓީ (އެމްއެންޔޫ)ގެ ގާނޫނަށް އިސްލާހު ގެނައުމުގެ ބިލާ، ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް)ގެ ގާނޫނަށް އިސްލާހު ގެނައުމުގެ ބިލަށް އާންމުންގެ ހިޔާލު ހޯދުމަށް ފުރުސަތު ހުޅުވާލައިފިއެވެ.
ރައްޔިތުންގެ މަޖިލީހުގެ ގައުމީ ތަރައްގީއާ ތަރިކައިގެ ކޮމިޓީގައި ދިރާސާކުރަމުން ގެންދާ މިދެބިލަށް އާންމުންގެ ހިޔާލު ހޯދުމަށް ހުޅުވާލީ ބުރާސްފަތި ދުވަހުއެވެ. މަޖިލީހުން ބުނީ މި ބިލަށް އެއްވެސް ހިޔާލެއް ނުވަތަ ކޮމެންޓެއް އޮތްނަމަ މިމަހުގެ 30 ވަނަ ދުވަހުގެ މެންދުރު 02:00 އާ ހަމައަށް އެކަން ކޮމިޓީއަށް ހުށަހެޅެނޭ ކަމަށެވެ. އެގޮތުން ހިޔާލު ފޮނުއްވުމަށް ކޮމިޓީގެ މެއިލް އެޑްރެސް mv.gov.majlis@committee އަށް ނުވަތަ ރައްޔިތުންގެ މަޖިލީހުގެ އިދާރާއަށް ލިޔުމުން ފޮނުއްވުމަށް އެދޭ ކަމަށް މަޖިލީހުން ބުންޏެވެ.
ގައުމީ ޔުނިވަރސިޓީއާ އިސްލާމިކް ޔުނިވަރސިޓީ އެއްކޮށްލާ އިސްލާމިކް ޔުނިވަރސީޓި އުވާލާ ބަހުސްއަކީ ގިނަ ބަޔަކު ހިޔާލު ތަފާތުވެފައިވާ ބޮޑު މައްސަލައެކެވެ. ސިޔާސީ ކަމަކަށް ހަދައި އެއްބަޔަކު އަނެއްބަޔަކަށް ބަހުގެ ހޫނު ހަމަލާތައް ދެމުންދަނިކޮށެވެ. ނަމަވެސް ޤާނޫނަށް ހުށަހެޅިފައިވާ އިސްލާހްތަކުގެ ތެރޭގައި ދެ ޔުނިވާސިޓީ އެެއްކޮށްލުމުގެ ވާހަކައެއް ނުހިމެނެ އެވެ.
ގައުމީ ޔުނިވަރސިޓީގެ ބިލް ހުށަހެޅުމުގެ ބޭނުމަކީ އެޔުނިވަރސިޓީގެ ވައިސް ޗާންސެލަރ އަދި ޑެޕިއުޓީ ވައިސް ޗާންސެލަރގެ މަގާމަށް މީހުން އައްޔަންކުރަނީ ޔުނިވަރސިޓީގެ ކައުންސިލުން ކަމުގައި އޮތް އޮތުން (ދިވެހިރާއްޖޭގެ ގައުމީ ޔުނިވަރސިޓީގެ ގާނޫނު) އަށް ގެނެވުނު ފުރަތަމަ އިސްލާހުގެ ދަށުން ބަދަލުކޮށް އެމަގާމުތަކަށް މީހުން އައްޔަން ކުރާނީ ރައީސުލްޖުމްހޫރިއްޔާ ކަމުގައި ހަމަޖެހިގެންގޮސްފައި ވީނަމަވެސް ކަމާގުޅޭގޮތުން ކައުންސިލަށް އޮތް އިހުތިޔާރުތަކާ ބެހޭ ބައެއް މާއްދާތައް އެގާނޫނުގައި އިސްލާހުކޮށްފައިނުވާތީ، އެގާނޫނުގައި ހުރި އެފަދަ ތައާރުޟުވުންތައް ނައްތާލުމަށާއި، އެގާނޫނު ތަންފީޒުކުރުމުގައި މިހާރު ދިމާވެފައިވާ ދަތިތައް ހައްލުކުރުމަށްޓަކައި ގެންނަންޖެހޭ އިސްލާހުތައް އިސްލާހުތައް ގެނައުމަށްށެވެ.
މީގެ އިތުރުން އިސްލާމީ ޔުނިވަރސިޓީގެ ގާނޫނު ތަންފީޒުކުރުމުގައި މިހާރު ދިމާވެފައިވާ ދަތިތައް ހައްލުކުރުމާއި، ޔުނިވަރސިޓީގެ ހިންގުމުގެ އިންތިޒާމްތައް (ދިވެހިރާއްޖޭގެ ގައުމީ ޔުނިވަރސިޓީގެ ގާނޫނު)ގެ ދަށުން އުފައްދާފައިވާ ގައުމީ ޔުނިވަރސިޓީގެ ހިންގުމާ ވީ ވަރަކުން އެއްގޮތްކުރުމަށްޓަކައި އެގާނޫނަށް ގެންނަންޖެހޭ އިސްލާހުތައް ގެނައުމަށްށެވެ. ނަމަވެސް ދެއިސްލާހަށް ބަހުސް ކުރައްވަމުން ބައެއް މެމްބަރުން މިދެޔުނިވަރސިޓީ އެއްކޮށްލުމަށް ގޮވާލައި ވަނީ ވާހަކަދައްކަވާފައެވެ.
އިސްލާމިކް ޔުނިވަރސިޓީގެ ހިންގުން މެދު ކަނޑާނުލައި ކުރިއަށް ގެންދަވާނެ ކަމުގެ ޔަގީންކަން މިމަހުގެ 26 ވަނަ ދުވަހު ރައީސް އިބްރާހިމް މުހައްމަދު ސޯލިހް ވަނީ ދެއްވާފައެވެ.
